mi sijelo e lipu ni lon ma mama pi kulupu dxwdəwʔabš.
tenpo ale la ona li lon ma ni. pona tawa ona.
ona li awen lon.
ni ale li pona a tan ni:
pana toki/sitelen: jan Pesija, waso Seko, jan Ana, jan Tene, soweli nasa Alesi, jan Lu, jan lili Enta, jan Lasuku, jan Lapate, jan Jaseki, jan Sate, jan Tolonpon, jan Ulusi, jan Janka, jan Penta, soweli Kina
weka pakala: ijo Wen, jan Pensa, jan Ke Tami, jan Tepo, jan Janka, selo Muna
lipu ilo: wasoweli Awasi, selo Muna
mama pi toki pona: jan Sonja
lukin: sina a :3
open: o kama pona
mu! o kama pona tawa lipu monsuta sin. mi pilin pona. taso mi pilin ike.
pona la: jan mute mute li pana e toki tawa lipu monsuta lon sike ni. wawa wawa a!
ike la: ni li lipu monsuta nanpa pini. sike suno tu tu la mi en jan pi pona mute li pali e lipu monsuta. taso, ijo ale li wile pini lon tenpo. sina ale pi pana pali en sina ale lukin o: sina pona pona pona. sina lon ala, la lipu monsuta li lon ala. mi wile jo e wawa ale, la mi ken pali e lipu monsuta lon sike suno ale mi. taso, mi jo ala e wawa ale. mi soweli lili taso. mi ken ala awen tawa. mi wile lape.
tenpo open pi lipu monsuta la, mi sona ala e ni: toki pona li ken ala ken monsuta? jan mute pi toki pona li wile ala wile monsuta? toki pona li toki suwi taso anu seme? tenpo open la mi sona taso e toki monsuta pi mute lili. taso, tenpo ni la toki monsuta MUTE li lon. ni li tan sina ale. tenpo ni la mi ale li sona pona: toki pona li ken monsuta monsuta a.
mi wile e ni: lipu monsuta li weka, la jan li awen toki monsuta, li awen sitelen monsuta. ken la, tenpo kama la, ijo sin li kama tan pini pi lipu monsuta. mi sona ala. mi wile ala lawa e ijo sin. mi wile soweli lili taso. wile kulupu li lon, la mi en jan pi wile monsuta li ken kama sona e ijo sin, lon kulupu, lon tenpo kama… taso, tenpo ni la mi en lipu monsuta li wile lape.
o monsuta pona,
selo Muna, soweli awen pi lipu monsuta<3
ijo li lon la, ona li linja mute taso. lon la, ma li linja mute taso; ale li linja mute taso.
linja ale o tawa nasin wan. linja li tawa nasin mute ante la, lon li ken ala jo e linja ni; ni li jaki mute li ike mute. linja ale li ken tawa nasin wan taso. ni li nasin tawa pona nanpa wan.
mi lukin e ma ni. ma ni li jo e tomo mute; tomo mute li jo e linja mute mute a. mi lukin e linja pi insa tomo; linja ni ale li tawa nasin wan, li linja pona.
mi lukin e ijo ante… ma ni li jo e supa mute; supa mute li jo e linja mute mute a. mi lukin e linja pi insa supa; linja ni ale li tawa nasin wan, li linja pona.
ijo mute pi ma ni li sama tawa tomo ni, tawa supa ni: kasi en lupa en pipi. seli en telo kin, li jo e linja pona taso.
linja ale li tawa nasin wan. lon la, ale li tawa nasin wan. mi sona e ni: ale li lon seme. mi sona e ni kin: ale li tawa seme. ale li pona, li awen pona.
o lukin. mi ken lukin e ijo nasa, e ijo mute nasa. mi wile lukin ala e ona; taso ona ale li kalama e kalama nasa a.
mi tawa lukin. ijo ni a… ona li pana e nimi “jan” tawa ona sama. lon ma ni la, ijo ale li ken tawa nasin wan taso. taso, ona li kalama mute, li tawa nasin mute, li pali e ijo mute, li ken ala awen. mi sona e ni: ona li lon seme. taso mi sona ala, li ken ala sona e ni: ona li tawa seme, li pali e seme, li ante e seme, li pakala e seme, li ken seme.
jan li lon. tan ni la, jan li linja mute taso. taso, pali jan li jo e linja jaki, e linja pi pona ala. mi ken ala alasa e open linja e pini linja; mi ken ala sona e nasin ona. kin la, linja ni li ken ante e linja pona. linja ni li lon la, linja ale li ken kama linja ike.
linja ni li ike nanpa wan; tawa pona la, ona ale o weka.
o lukin. mi pali e ijo ni. mi pana e nimi “ilo” tawa ona. ilo li ken pana e wile ale tawa jan. tawa ona la, ilo li ken ale. ona li ken pana e moku, e telo, e toki, e musi, e sitelen. taso, insa la, ona li wile jo e ijo wan: lon pi ma wile jan… ma Wilejan. lon ma Wilejan la, ilo mute li lon. jan ale li jo e ilo. ilo li pana e wile ale tawa jan. jan ale li jo e wile ale ona la, ona li wile ala weka tan ma Wilejan. ni la, jan ale li awen lon ma wan, li ken ala ike e linja pona.
jan wan li wile mute weka tan ma Wilejan la… ilo li ken ante e ni.
nanpa tu: jan
sina wile e seme? mi jan wan pi ma Wilejan; tenpo ale la, mi kama jo e wile ale mi. mi wile la, ilo li pana.
tenpo Wilejan li lon tenpo sike mute mute mute a; jan ala pi ma Wilejan li sona e nanpa pi tenpo sike. tawa kulupu pi ma ni la, tenpo Wilejan li lon tenpo ale.
a… ken la, ilo li jo e pilin sama. mi toki e ni tawa ilo: “tenpo pini mute mute la, ma Wilejan li lon ala lon?”
ilo li toki e ni: “lon.”
“lon tenpo ale la, pini pi ma Wilejan li kama ala kama?”
“sona ala.”
n… taso, sina pana e tenpo tawa lawa sina la, sina kin li kama jo e pilin ni: lon tenpo wan la, ma Wilejan li lon ala. o kepeken e lawa: kasi wan li ken ala lon tenpo ale; soweli wan li ken ala lon tenpo ale. ijo ala li ken lon tenpo ale! kin la, kulupu jan li ken ala lon tenpo ale la, ma Wilejan li ken ala lon tenpo ale!
mi toki tawa ilo: “taso, tenpo wan la, jan li lon ala. ma Wilejan li sama ala tan seme?”
taso ilo li jo e lawa suli a; ilo li toki: “lon la; lon tenpo wan la, sina lon ala. taso, sina lon ala la, jan ante li lon anu seme? jan li awen unpa li awen pana e jan sin la, jan li ken lon tenpo ale. ma Wilejan li sama.”
a. ma Wilejan li ken lon tenpo ale.
taso, mi jan. tan ni la, mi ken pali e ijo mute a. kin la, kepeken ilo pi poka mi la, mi ken pali e ale a. lon la, ma Wilejan li ken lon tenpo ale; taso…
“mi wile… pakala e ma Wilejan la… seme li pakala e nasin mi?”
“sina ken ala.”
“seme? a… mi ken ala ken weka tan ma Wilejan?”
“sina wile ala weka tan ma Wilejan.”
“tan seme a? pona suli seme li lon insa pi ma Wilejan?”
“sina ken kama jo e wile ale sina.”
“taso mi jo e wile sona; sina ken ala pana e sona pi wile sona mi.”
tenpo lili la ilo li toki ala.
mi toki e ni: “seme li lon insa ala pi ma Wilejan?”
“sina wile ala sona.”
“taso lon ala a! mi wile sona!”
tenpo lili la, taso tenpo mute la, ilo li awen, li kalama ala, li tawa ala.
“sina wile ala sona.”
sina ken lukin, ni li nasa a! mi jan pi ma Wilejan; tenpo ale pi lon mi la, mi lon ma Wilejan! ilo li pana e wile ale tawa mi; taso, ilo li ken ala e ni anu seme? ilo li ken ala e ni la, ma Wilejan li lon tan seme?
mi kama jo e pilin ike mute tawa ilo ni. mi tawa. mi tawa mute; nasin li suli a. tomo li kama li tawa; supa li kama li tawa; kasi en lupa en pipi… ale li kama li tawa. ala li ken pakala e nasin mi.
noka mi li pilin ike. sijelo mi li lanpan li weka e kon. taso, lon sinpin mi la, leko kiwen mute li lon. jan… anu ilo… pi tenpo pini li pali e selo mute kepeken leko ni.
jan mute li lon tomo poka; jan ni li lukin e mi, li kama jo e sinpin pi pilin ike. tenpo ale pi lon ona la, ona li jo ala e pilin ike. tawa ona la, “ike” li jo ala e kon, li nimi sin. tenpo ni la, ona li sona e kon ike.
mi luka e leko wan, li open e tawa sewi. suli pi selo ni li mute a. taso, lon poka ante selo la, mi ken ale… lon la, mi wile ala e ilo. ilo li ken pana e mute; taso, ona ale li wile selo e mi taso. lon poka ante la, toki en sitelen en pilin en lawa, li ijo jan… li ijo pi ilo ala.
jan wan pi tomo poka li kalama suli e ni tawa mi: “sina seme?! sina ken moli a!”
mi toki kalama suli sama e ni: “sina jo e wile ale sina anu seme?”
“jo a!”
“taso ilo li jo e wile kin. sina wile awen lon ma Wilejan anu seme?”
“ilo ale li jo e wile wan: ilo li wile pana e wile ale mi tawa mi! ale li sona e—”
mi ken kute e ilo ale. tenpo sama la, ona ale li kalama e kalama pi suli nanpa wan, e kalama pi pakala kute, e nimi pi mute lili: “o awen. sina sona ala e ike pi ma ante. ma Wilejan li pana e wile ale sina.”
lon ale la, ilo li wile lanpan, li wile weka e mi. ilo li lon monsi selo, li lon tomo, li lon sewi kasi. kepeken tenpo lili a, ilo li open tawa sewi lon selo, lon anpa mi. kepeken tenpo lili la, mi lanpan e luka pi jan poka li weka e ona tan ilo ale.
tenpo lili la, mi en jan tomo li luka e leko pi sewi nanpa wan. kepeken wawa ale pi sijelo mi la, mi sewi e sijelo mi; noka mi li lon sewi selo. mi kalama suli e ni tawa ilo, tawa jan ante pi ma ni… tawa ale pi ma Wilejan: “ni li ma Wilejan ala a; ni li ma wile ilo!ilo li pana ala e wile wan tawa sina ale: wawa!”
ni la, mi en jan tomo li tawa anpa, li tawa anpa tawa poka ante, tawa poka pi ilo ala, tawa poka pi wawa jan.
nanpa tu wan: nasin
mi en jan tomo li tawa wawa tan selo suli. mi tu li tawa kasi mute, tawa ma mute, tawa ijo pi kule mute. tan lukin ni la, kule pi ma Wilejan li walo li pimeja taso. mi tu li awen tawa la, mi tu li kama lukin e kule mute, e soweli mute, e waso mute.
mi tu li pini lon linja suli telo; tenpo ni la ilo li ken ala lukin e mi. mi pilin e wawa la, mi weka e len tan sijelo mi, li telo e len mi.
jan poka li jo e lukin pi pilin nasa. ona li lukin tawa mi la, ona li kama jo e lukin pi nasa mute.
ona li toki e ni: “mi tawa tan seme?”
tan lukin mi la, ona li pilin ala e wawa. mi toki e ni: “ni li suli ala a. lon ni la, ilo li anpa ala e sina.”
ona li lukin tawa poka ona.
mi awen toki; “sina wile e seme? sina wile pali e seme? ilo li ken ala pini e sina.”
tenpo suli li pini la, ona li toki; “mi sona a.”
“a, sina wile e seme?”
kepeken kalama pi suli mute a, ona li toki e ni: “mi wile e*moku***! mi jan ala pi ma ni; taso sina lanpan e mi, li pana e mi tawa ma ni! ni li pakala nanpa wan!**”
kalama ala la, mi lukin tawa ona.
ona li awen; “mi jo ala emokueteloetomola, mi ken ala kepeken e ‘wawa mi’ a!pakala seme li lon lawa sina?!”
kepeken musi la, mi toki e ni: “a… ken la, mi jo ala e lawa pi wawa mute; taso, mi jo e telo!”
mi lukin tawa poka mi, tawa nasin pi linja telo. mi ken lukin e soweli moli, e kasi pi kili lili mute.
“o lukin! mi jo e moku kin! mi tu li ken lape lon anpa pi kasi ni.”
ona li tawa li lanpan e soweli moli; mi awen telo e len mi.
mi sewi e len mi tan telo; ni la len mi li jaki ala.
taso, jaki li tawa seme? mi ken ala sona.
lon la, ale li linja. jan li pali la, pali ona li ken ante e ijo ante. ijo ante ni li ken ante e ijo ante sin; ijo ante ni li ken ante e ijo ante sin… pini ala la, pali ale li linja tan ijo wan tawa ijo wan ante.
mi telo e len mi la, jaki li tawa lon insa pi linja taso, tawa poki telo pi suli mute, tawa insa kala, tawa insa soweli, tawa insa jan. ken la, soweli pi poka mi li jo e jaki, e jaki mi.
mi lukin tawa jan tomo. ona li pali e seli lili tan kasi; sijelo soweli li lon sewi seli.
mi tawa poka seli. mi open toki e ni: “nimi sina li seme?”
“jan Jali.”
“sona sina pi seli moku li kama tan seme? sina lon ma Wilejan la, ilo li ken pali e moku tawa sina.”
“mama mi li pana e sona tawa mi. mama mi li pilin e ni: seli moku en pali moku li ijo musi, li sama tawa pali pi kalama musi. mi kama pilin e ni kin.”
tenpo mun ni la, mi en jan Jali li moku e soweli seli, e kili, e telo, li tawa lape lon anpa kasi.
taso, mi weka tan lape la, jan Jali li lon ala.
mi lukin tawa kasi pi lape mi; anpa suno la, kasi pi lape mi li jo e lukin nasa lili…
jan Jali li sitelen lon selo kasi kepeken palisa kasi! ona li sitelen e ni:
jan nasa o - mi ken ala awen lon ma ni - mi tawa li alasa e ma Wilejan - ilo li ken wile moli e mi tan weka mi - taso moli pi ma ni li ike nanpa wan - lon tenpo ala la mi wile e ni - pona o tawa sina
ona li toki e lon. lon la, mi lanpan e ona li pana e ona tawa poka mi. pilin ona li sama ala tawa pilin mi.
sama tawa tenpo suno pini la, mi jaki e telo lon tenpo pini, li moku e jaki lon tenpo ni. mi pali la, pali mi li tawa linja, li ante e mute.
pali ale li linja! a, tenpo pini la, mi wile sona e ni! mi sona ala e ni la, mi pakala suli a!
o lukin! ale li wile toki e ni tawa mi! sitelen ona li jo e linja mute! kasi… li linja suli wan taso! linja telo li linja suli wan taso! ma Wilejan kin li jo e linja mute mute a! ken la, ijo ale li jo e linja mute taso! kasi en lupa, en pipi en supa, li jo e linja taso! ale li linja! ale li linja! o kute e linja!
…lon a. sina wile pona lon ma ni la, o kute e mi. lon li wile pana e sona sama tawa sina; taso ona li kepeken e nasin toki ante. sina kute e mi la, sina kama sona e nasin toki pi ijo ale—
ijo li lon la, ona li linja mute taso. lon la, ma li linja mute taso; ale li linja mute taso.
linja ale o tawa nasin wan. linja li tawa nasin mute ante la, lon li ken ala jo e linja ni; ni li jaki mute li ike mute. linja ale li ken tawa nasin wan taso. ni li nasin tawa pona nanpa wan.
lape mi li pini tan kalama nasa
mi open e oko mi li lukin e tomo mi
mi ken ala lukin e tan pi kalama ni
pimeja li len ike e ijo ale
kalama li kama lon tenpo sin
kute la kalama li sama akesi
mi weka tan supa lape mi
noka mi li pilin e supa anpa
kin la, mi pilin e ijo ante kepeken noka
kalama li kama tan anpa
noka mi li kama sewi
mi kama lon supa lape mi li lukin tawa supa anpa
mi lukin ala e ijo
mi tawa lon anpa len lon supa lape
mi kute e kalama monsuta
kalama li awen lon li kama suli
len li len e sijelo ale mi
taso, mi ken pilin e ijo lon sewi len
ijo li kama tan noka mi tawa sijelo mi
ona li tawa lon sewi len lon sijelo mi
pilin la ona li sama akesi linja pi suli mute
mi pilin e ona lon lawa mi
kalama suli wawa li kama tan ona
jan lawa o! alasa sona sina li ken ala pona. sina wile la o poki e mi lon tenpo ale. sina wile e jan ike lon nasin lawa ike sina la o moli anu poki e mi. taso mi ken ala toki e sona sin. tenpo pini la mi toki e ale pi sona mi. mi toki e ona kepeken nasin pona. mi toki ala e lon ala li ante ala e lon. toki mi li nasa tawa sina la ni li tan pimeja monsuta lon lawa mi. pali monsuta li pana e ona. ona li pakala e lawa mi.
mi sona ala e ni: jan Ali Walen li kama seme. taso mi wile e ni: ona li lape lon moli. tenpo sike luka la mi jan pona ona li jan pali ona lon alasa pi sona nasa ona. ni li lon: tenpo pimeja la jan lukin sina li ken lukin e mi tu lon nena Kenwi. mi tu li tawa ma telo Sipe li jo e ilo suno e palisa pali ma e ilo e linja ilo mute. pali mi la mi kepeken e ona. pali ni li suli lon lawa nasa mi. taso mi toki e pali kama e tan ona lon tenpo mute pini. mi toki e ale pi sona mi. sina toki e ni: toki mi li ken ala lon tan ni: tomo ala li lon ma telo Sipe. mi toki e ni: mi sona e lukin mi taso. ona li ken sitelen lape li ken sitelen pi lawa mi. mi wile e ni. taso, ni taso li lon sona mi tan tenpo pimeja ni. mi ken ala sona e ni: jan Ali Walen li kama ala tan seme.
mi sona e alasa sona nasa pi jan Ali Walen. mi pali lili e ona. lipu nasa ona pi sona ken ala li lon toki mi la mi lukin e ona.. taso lipu mute li lon toki Alapi anu toki ante. lipu suli ona li lon sitelen nasa. mi lukin ala e sitelen ni lon ante. jan Ali Walen li jo e lipu suli ni lon tenpo pimeja ni. tenpo ala la jan Walen li toki e sona pi lipu ni. mi weka sona mute pi alasa sona mi. taso ni li pona tawa mi. alasa sona li ike. mi pali e ona tan wile sona nasa. mi pali ala e ona tan wile pona. tenpo mute la jan Walen li lawa e mi. tenpo lili la mi pilin monsuta tan ona. tenpo pimeja wan la ona li toki e tan ken pi nasa ni: tenpo pi mute lili la sijelo moli li ken ala kama jaki, li awen sin lon insa poki moli ona lon tenpo ale. taso tenpo ni la mi pilin monsuta ala. ona li sona e monsuta wawa pi ken sona ala. ni la mi pilin monsuta tawa ona.
mi sona ala e wile mi lon tenpo pimeja ni. ken suli la wile mi li tan lipu pi sitelen nasa. jan Walen li kama jo e ona tan ma Palata lon tenpo mun pini. taso mi sona ala e ni: mi alasa e seme lon tenpo pimeja ni. jan lukin sina li lukin e mi lon nasin tawa ma telo Sipe lon open pi tenpo pimeja ni. ni li ken lon. taso mi sona ala e ona. mi sona e tenpo wan taso, lon pini pi tenpo pimeja. sike pi mun majuna li sewi lon pimeja.
mi kama tawa ma kiwen pi jan moli. mi pilin monsuta tan majuna lukin ona. ona li lon ma telo lon kasi mute li jo e kon jaki. ona li sama kon pi kiwen jaki. mi pilin monsuta tan ni: mi tu li jan nanpa wan lon tomo ni tan tenpo majuna. mi ken lukin e poki moli e kiwen e tomo moli e kon jaki tan ma anpa lon suno lili mun. ale li pakala lili li jo e selo telo lili li len tan kasi mute.
sona nanpa wan mi li ni: mi pini tawa lon kiwen suli li open e poki mi. ni la mi lukin e ni: poki mi li jo e ilo suno e palisa pali ma tu. poki pi jan Walen li jo e ilo suno sama e ilo toki. mi toki ala tan ni: mi sona e pali mi. mi awen ala. mi open e pali. mi pakala e ma. mi pini la mi lukin e kiwen suli. jan Walen li weka. tenpo lili li kama weka la ona li kama sin li alasa tawa e kiwen kepeken palisa ona. taso ona li ken ala, li toki luka e ni tawa mi: “o pali”. pini la wawa pi mi tu li tawa e kiwen.
lupa pimeja li lon anpa kiwen. kon jaki mute li kama tan ona. ni la mi tu li tawa weka li monsuta. mi kama sin la kon li jaki lili taso. mi lukin e nasin leko. sinpin li jo e telo jaki ma. tenpo ni la mi sona e kalama toki nanpa wan. jan Walen li toki tawa mi. kalama ona li monsuta ala tan ni ale.
ona li toki e ni: “mi wile ala e ni. taso sina o awen lon ma sewi. sina ken ala tawa anpa. toki mi en lipu mi li ken ala pona e sina tawa pali kama mi. mi o pali o lukin e ijo nasa, jan Kate o. ni li pali ike mute. jan li tawa anpa li jo ala e lawa wawa, la lawa ona li pakala li kama nasa. mi wile ala pilin ike e sina. taso sina ken ala tawa anpa. ni li pali mi taso. mi ken ala tawa e sina tawa moli, tawa lawa nasa. mi toki e ni: sina sona ala e lon. taso mi toki tawa sina lon pali ale kepeken ilo toki. mi jo e linja mute pi ilo toki. linja pi ilo toki li suli. mi tawa insa ma la ona li lon kin!”
tenpo ni kin la mi ken kute e nimi ona lon lawa mi. mi ken sona e pilin mi. mi wile tawa, taso ona li ken ala e ni. pini la ona li toki e ni: “sina awen wile tawa la mi weka. alasa ni li kama pini.” ni la mi awen lon sewi tan ni: ona taso li jo e ilo. mi sona e ale ni. taso mi sona ala e wile pi alasa mi. mi awen la jan Walen li open e ilo li kama jo e pini pi linja toki. mi jo e open linja li awen lon kiwen lon poka lupa. ona li tawa anpa.
tenpo lili la mi ken lukin e suno pi ilo suno ona li kute e kalama linja. taso ilo suno li weka tan ni: nasin li tawa poka. kalama kin li weka. mi wan lon suno mun. taso mi lon poka ona kin, kepeken linja toki.
lawa mi li pali e sitelen nasa lon tenpo pimeja pi kalama ala. nasa ni la kiwen li kama pilin, li sona e ijo monsuta. poka pi kiwen moli la kon pimeja li tawa lon nasin, sama kulupu nasa pi tenpo sewi ike. pimeja nasa ni li ken ala tan suno mun pi wawa ala. tenpo ale la mi lukin e ilo tenpo luka mi kepeken ilo suno. mi alasa kute e ilo toki. taso kipisi tu pi tenpo sike lili la ala li lon. sin la ilo toki li pana e kalama lili. mi toki tawa jan Walen. mi monsuta. kalama ona li wawa ala tan pilin monsuta mute. tenpo pini la ona li monsuta ala. taso ni la ona li toki e ni:
“sewi a! sina ken lukin e ni la…”
mi ken ala toki. kalama ala. mi ken awen taso. ona li awen toki e ni:
“jan Kate o! ni li nasa li monsuta li ike. sina ken ala sona e ona!”
ni la kalama mi li pakala ala. mi awen monsuta. taso mi toki mute e alasa sona mute: “jan Walen o! seme li lon? seme li lon?”
mi kute e toki pi jan pona mi. kalama ona li monsuta li toki e ni:
“jan Kate o! mi ken ala toki e ona. lawa ala li ken sona e ni. mi o toki ala. jan li sona la ona li moli. sewi a! sitelen lape mi li ken ala pali e ni!” ala li lon. kalama mi li lon taso. mi awen alasa sona tan ona. jan Walen li monsuta mute li toki e ni:
“jan Kate o! sina ken la o pana e kiwen suli tawa lupa o tawa weka! o pali! o jo ala e ijo o tawa weka taso! ni li tenpo ken taso. o pali o alasa sona ala!”
mi kute. taso mi ken awen alasa sona taso. kiwen moli en pimeja li lon poka mi. ijo nasa monsuta li lon anpa mi. taso jan pona mi li lon tenpo pi ken moli. ni la mi pilin monsuta li pilin e ni: mi ken ala tawa weka. mi pali la ona li wan taso lon anpa. kalama lili li lon. tenpo lili li kama weka la jan Walen li pali e kalama suli li toki e ni:
“o weka! jan Kate o pana e kiwen o weka!”
ni la mi pilin e ni: mi o pali e ijo. mi toki e ni: “jan Walen o awen! mi tawa anpa!” ni la ona li monsuta mute. kalama ona li kama monsuta:
“o ala! sina sona ala! mi ken ala pali tan mi. o pana e kiwen o tawa. sina ken pali e ni taso lon tenpo ni!” kalama ona li ante. ona li kama anpa. taso ona li awen monsuta kin.
ona li toki e ni: “o pali!” mi kute ala e ona li alasa pali. mi wile tawa anpa. taso kalama ona sin li monsuta e mi. ona li toki e ni:
“ona li tawa ala… sina o… jan wan li ike la tu li ike mute… kiwen” ona li toki ala lon tenpo lili. ona li awen la kalama lili en toki ona li lon. ona li toki e ni:
“pini li kama. o suli ala e ike. o pini e nasin leko o weka. tenpo sina li kama lili. o tawa pona. mi tu li toki ala lon tenpo kama” ni la kalama lili pi jan Walen li kama anpa. ona li pilin ike mute li awen toki e ni:
“ijo ike ni o moli! sewi a! o weka! o weka!”
ona li pini la kalama ala li lon. mi awen toki tawa ona. taso mi kute ala e ona. mi sona ala e ni: mi awen lon tenpo seme. taso mi awen toki e ni: “jan Walen o! jan Walen o! o toki! sina lon ala lon?”
pini la ijo monsuta ike nasa li kama tawa mi! mi pini toki la mi kute e kalama lili tan ilo toki. mi alasa kute mute. sin la mi toki e ni: “jan Walen o. sina lon ala lon?”. taso ijo ante li toki tawa mi. ijo ni li pakala e lawa mi. mi ken ala toki e ona. mi ken ala sona e ona. ona li weka e sona mi tan tenpo ike, tawa tenpo mi pi kama lape ala, lon tomo misikeke. mi ken toki e ni taso: kalama ike li suli li jo ala e kon li weka li tan jan ala. taso mi o toki e seme sin? ni li pini pi sona mi. mi kute taso e ona. mi sona ala e ona. mi kute e kalama tan tomo moli tan anpa tan ma pi kon pimeja. ona li toki e ni:
“jan Walen li moli!”
jan Tene li toki pona e toki ante pi jan Epi Laka lon ni
mi lon tomo pi jan poka mi. mi tu li wile moku. jan poka mi li jan Ako. ona li pilin ike lon tenpo mute. taso tenpo ni la, ona li pilin pona. ni li pona tawa mi kin.
mi toki tawa jan Ako: “tenpo poka la… pali sina li seme?” ona li toki: “pona mute a.” uta mi li tawa sewi. “pilin sina li seme?” “pona mute a.” “ale sina li seme?” “pona mute a.”
toki ale ni la, kalama ona li sama. ni li… nasa lili. taso pona ona li pona tawa mi.
moku li sijelo soweli li kasi. pilin uta la, sijelo li nasa. ona li sama ko. taso, mi pilin sama ni kin: ijo lili nasa li lon moku.
mi toki e ni: “nn… moku ni li seme?” “pona mute a.” mi mu musi lili. “ala, moku ni li soweli seme?” jan Ako li lukin e mi. “ni li suli ala.”
ni li nasa tawa mi. taso, mi wile pona tawa jan poka mi. ni la, mi moku e sijelo nasa. jan Ako li pilin pona. mi kin o pilin pona. mi awen moku.
moku li pini la, mi tawa sewi tan supa. noka mi li pilin wawa ala. “a, mi o weka.” mi toki e ni. “omekapo!” jan Ako li awen lukin e mi. ona li toki e ni: “tawa… pona.” sinpin ona li ante ala.
mi lon tomo mi la, mi kama pilin nasa. insa mi li tawa sike. poki moku mi li pilin ike. noka mi li kama wawa ala la, mi tawa anpa. moku insa li tawa sewi, sewi, sewi… li tawa weka tan uta mi. telo li lon lukin mi. kon mi li kama nasa.
mi lukin e moku lon anpa. sike lili mute li lon ona. lukin la, ona li sama… sike mama? taso, ijo ante li lon insa mi. mi ken pilin e ona.
ijo nasa li tawa lon insa mi. mi pilin e noka mute. ona li tawa sewi lon lupa moku mi. mi ken ala moku e kon. ona li lon uta mi la, uta mi li open. ijo li pipi suli.
mi alasa moku e kon, taso ken ala. lukin mi li kama pimeja. pipi li tawa insa mi. mi ken pilin e ona lon lawa mi. mi alasa toki. taso toki ala li kama.
mi wile tawa e luka mi. mi alasa tawa. taso ona li awen. mi pilin nasa ike mute. mi pilin…
mi pilin pona.
uta mi li tawa sewi. mi lukin e sike lon anpa. mi kama jo e ona li tawa tomo moku. jan poka mi o kama tawa tomo mi. mi o pali e moku. moku pona.
jan Poli en jan Keta en jan Witon li lon ma kasi soweli. sewi Sa li mama e jan ni e ma ni. sewi Sa li toki e ni: “o moku ala e kili sona. sina moku e ona la, sina moli.” jan ni li pilin monsuta tan toki ona.
sewi Sa li toki e ni kin: “o toki ala tawa linja monsuta.” jan ni li pilin monsuta mute tan linja monsuta.
suno mute li tawa mute. suno en moku la, jan ni li pilin pona taso. jan Poli en jan Keta li tawa pona lon ma. jan Witon li nimi e kasi e soweli. tenpo li ike ala e sijelo jan.
mun li tawa lon sewi, taso pimeja li kama ala. kili li pilin pona tawa uta. telo li kule ala. kon li sin li pilin pona tawa selo sijelo. toki ale li pona. pilin ike li ala. jan li awen. ale li suno. ale li seli pona. ale li pona taso. ike li ala.
ale li lon wile pi sewi Sa.
*****
jan Poli en jan Keta li tawa lon nasin ma la, jan ni li oko e linja monsuta. sijelo pi linja monsuta li ike. ona li lukin e jan ni.
jan Keta li pilin monsuta li toki e ni: “mi wile weka.”
toki pi linja monsuta li pini e toki pi jan Poli. “sina pilin monsuta tan seme?”
jan Poli li toki e ni: “sina ike!”
linja monsuta li weka e kon. “sewi Sa li toki e ni tawa sina, anu seme?”
jan tu li lukin e ona tu. “lon, taso mi lukin e ike sina.”
“sijelo mi li ike tan seme?”
jan ni li sona ala e wile toki ona.
linja monsuta li tawa lon palisa kasi. “mi ike, taso mi pona. ni li nasin pi ma ale.”
jan Keta li toki e ni: “mi tu o weka.”
“sina pilin monsuta tan ni: sina sona e lon mi. ala li pona ale anu ike ale. ijo ale li pona li ike.”
jan Poli li toki e ni: “sina toki e ni anu seme: sewi Sa li ike a?”
linja monsuta li tawa sewi lon kasi. “sewi Sa li pona li ike. mi sona e ni: pona ona la, ona li ike mute.” kili sona tu wan li tawa anpa tan kasi. “sina moku e kili ni la, sina kama sona mute. sina kama wile ala e toki sona pi sewi Sa. sina kama sona e nasin pona e nasin ike. sina moku e ona la, sina moli, taso sina moli lon tenpo kama pi poka ala.”
jan Poli li tawa kili. jan Keta li luka e ona li toki e ni: “o moku ala e kili! sina kama moli! pilin sina la, linja monsuta li toki e lon, anu seme?”
jan Poli li weka tan luka pi jan Keta. “mi sona ala. mi sona e ni: ijo lon mi li weka. mi sona ala e ijo ni. nasin sona li ni: sina o moku e kili.”
jan Keta li sona ala e wile toki ona.
jan Poli li moku e kili sona. ona li moli ala. selo ona li lukin ante ala. suno li lon. kon tawa li lon. ma li lon mute. telo li weka tan oko ona.
jan Keta li tawa ona. “sina pilin ike tan seme?”
jan Poli li toki e ni: “mi pilin ike ala. mi pilin pona mute mute a. mi pilin… ijo. mi sona ala lon tenpo pini.”
linja monsuta li tawa ma. jan Poli la, sijelo linja li lukin ike ala. linja li toki e ni: “ijo li sona li musi.”
“musi li pona a! oko mi li telo tan ni: oko mi li ken telo! ni li pilin pona mute mute mute!”
suno sewi li suno lon kasi. jan Keta li oko e suno, taso jan Poli li oko e suno pi wawa mute. jan Keta li sona e ni. ona li moku e kili sona. ona li sona li moli ala. oko ona li telo.
linja monsuta li toki e ni: “tenpo pini la mi pali e lupa weka lon selo kiwen pi sike ma. o pana e kili sona tawa jan Witon o weka tan ma ni! sewi Sa li wile lanpan e sina!”
jan Poli li lanpan e kili sona li lukin e linja monsuta. “nimi sina li seme? nimi sina li ‘linja monsuta’ ala, anu seme?”
“sina toki la, mi pilin pona. nimi mi li ni: akesi Anjela.”
*****
jan ni li tawa pi kalama lili lon ma. ona li moli ala. tan ni la, ona li pilin sona e ni: sewi Sa li wile moli e ona. ona li pilin apeja tan selo ona. jan Poli li lanpan e kasi li len e sijelo pi ona tu kepeken kasi.
suno sewi li alasa e jan tu. ona tu li alasa e jan Witon.
jan Witon li kute e kalama lon kasi. ona li tawa kalama, li oko e jan tu, li toki e ni: “sina lon kasi tan seme seme?” kalama ala li lon kon. “sina kasi e sijelo tan seme?”
jan Poli li tawa sewi e lawa ona. “mi tu li moku e kili sona.”
“sina… seme?”
jan Poli li tawa luka e kili sona. “sina moku e kili la, sina kama sona! sina kama sona e wawa e pona e ike!”
jan Witon li tawa monsi lili. “linja monsuta li toki tawa sina. sina kute. sina sona pilin e toki monsuta.”
“lon, taso mi kama sona mute tan moku. sina kama–”
lukin pi pilin monsuta li lon sinpin pi jan Witon. “mi kute ala e sina! mi tawa sewi Sa!” jan Witon li tawa wawa weka li tawa nasin ma.
jan Keta li oko e jan Poli. ona li pilin monsuta li tawa wawa. nasin weka wan li lon. ona li lupa weka.
*****
kon telo li tawa wawa lon ma. lipu kasi li weka tan kasi mama li waso lon kon. kon len li len e suno. soweli en waso en pipi en akesi li pilin monsuta tan kon ike pi sewi Sa.
jan tu li tawa lon ma. pilin sijelo ona li wawa sike mute. luka ona li tawa monsuta mute.
ona li tawa ma supa. kasi li lon selo pi ma supa, taso li lon ona ala. lupa weka li lon selo pi ma supa li lili. sewi Sa li lon sinpin pi lupa weka li suli mute li suno mute. lukin pi pilin ike li lon sinpin pi sewi Sa. oko ona li len.
jan tu li len lon anpa kasi. sinpin pi sewi Sa li kama pona. kon li tawa ala. kon len li weka. oko pi sewi Sa li open. toki li wawa. “mi ken oko e sina.”
telo lon insa pi sijelo jan li tawa monsuta.
“o weka tan len. o kama.” kon wawa li tawa e jan tu lon ma supa. jan Keta li kalama wawa monsuta.
sewi Sa li tawa ona. toki ona li sama kon pona. “sina moku e kili sona.”
pilin monsuta li moli e toki pi jan tu.
“sina ike ala. o pilin monsuta ala. mi pali e nasin ona. mi pali e ma e ijo ma ale. mi pali e linja monsuta e kili sona tan nasin sona: mi wile sona e pakala pi lawa sijelo sina. mi ken ala oko e insa pi lawa sina. sina kama ike tawa mi la mi wile sona.”
jan Poli li kama jo e wawa li kama sewi lon noka. “mi tu li ike li pona. ni li nasin lon pi ijo ale. kin la, nimi akesi li ‘linja monsuta’ ala. ona li ‘akesi Anjela’.”
“sina weka la mi pilin ike.” sewi Sa li pana e luka ona tawa jan. “mi ken pona e sina. sina pi tenpo open la, sina kama pona mute.”
jan Keta li tawa weka wawa. “ala! ala a!”
jan Poli li ken ala oko e tawa pi sewi Sa. kon li tawa mute tan tawa pi sewi Sa. sewi Sa li lanpan e lawa pi jan Keta li awen e jan Keta. jan Keta li kalama monsuta mute.
jan Poli li toki wawa e ni: “o pini! o pini!”
toki nasa li toki lili e ni: “o tawa weka!”
jan Poli li lukin sike e kasi li oko e akesi Anjela. ona li toki sin e ni: “o tawa weka! lupa weka li poka!”
“mi weka la, sewi Sa li ante e jan Keta!” jan Poli li tawa sewi Sa.
sewi Sa li weka e luka ona lon lawa pi jan Keta. jan Keta li kalama ala. ala li lon oko ona. sewi Sa li toki e ni: “mi nimi e sina: jan Lita. sina pilin e seme?”
jan Keta li toki e ni: “mi pilin pona. mi pilin awen.”
sewi Sa li oko e jan Poli li pana e luka. “o kama.”
ijo li waso tan kasi li utala e sewi Sa. ona li akesi Anjela. ona li tawa sike lon sewi Sa li lili wawa e ona. sewi Sa li ken ala tawa. ona li toki wawa. “o weka! mi wile ante e sina kin!”
akesi Anjela li toki wawa a ni: “o tawa weka!”
jan Poli li tawa wawa monsuta li tawa lupa weka. ona li lukin monsi ala. ona li kama lili tawa lon lupa weka.
*****
ma weka li kule. jan Poli li oko ala e walo taso e pimeja taso. ona li lukin e loje e laso e jelo e kule mute. ma weka li musi. olin li lon ma weka.
weka a tan ma sike ni la, ijo li lon sewi pimeja li sike e ma sike sama mun. lon la, ijo ni li poki kiwen; insa ona la, meli en mije li lon. tenpo suno luka luka pini la, ona li kama lon ni, li pali tawa sona: ona li awen e kasi, li nanpa e ijo jaki lili, li lukin ilo e kon pi ma sike. ona o awen tawa ni: ilo tawa li kama. sona ona la, ilo tawa li kama lon tenpo suno mute tu wan. tenpo awen li pona tawa ni: ona li ken pini e pali ona pi kama sona. taso ona li wile a kama sin lon ma! jan li wile ala awen lon pimeja suli.
tenpo suno nanpa luka luka wan
ilo toki li kalama: jan mun o, jan mun o, sina lon ala lon?
meli mun li toki: lon a! jan ma o, sina seme?
jan ma: ale li pona! taso … lon la, ale li pona ala tan [mu jaki pi ilo toki]
meli mun: toki sina li kama pona ala tawa mi. mu jaki mute li lon. ken la, suno li wawa li pakala e toki weka. taso … sina toki e ni anu seme: “ale li pona ala”?
jan ma: sina kute pona [mu jaki] kama lon sike suno wan tan [mu jaki]
tenpo ni la, mije mun li toki: jan ma o, jan ma o, mi tu li ken ala kute pona e toki sina. sike suno wan la seme a?
jan ma: jan li kama sin e sina lon ma. ilo tawa li ken ala kama tan [mu jaki] utala suli lon ma [mu jaki] suno wan. ni la, sike suno wan la, sina ken kama sin lon [mu jaki; toki li pini]
ilo toki li awen ala toki. kalama ala li lon poki. taso ona tu li sona e ni—ona o awen lon poki ni. tenpo suli kama la ona o lon ni. jan ala li ken tawa e ona tan poki lili ni.
meli: telo mute en moku mute li lon.
mije: lon a. sike suno luka la mi awen lon ni la, mi tu li ken awen lon, li ken pona.
meli: (ona li pana e kon lili tan uta) ale li pona. mi tu li wile awen pali. mi ken seme ante a?
tenpo suno nanpa luka luka luka
tenpo suno sin li open. meli li lon tomo ona, li pini e lape lon supa lape. ona li toki insa e pali pi tenpo suno ni: kasi, en nanpa, en ijo jaki, en pali sona ante kin li lon lawa ona. ona li pali e ijo sama lon tenpo suno ale; seme la tenpo suno ni li ken ante?
ona li telo e ona, li len e ona. ona li tawa lupa pi tomo ona … taso ona li awen. ona li kute e kalama nasa. kalama li lili, li wile e wawa ale pi kute ona. kalama ni li lon poka pi kalama ala.
taso lon la, kalama lili a li lon: “mu-u, mu-u, mu-u…”
nasa a. kalama ni li … seme a?
ona li alasa e kalama lon tomo ona. tasa ona li tawa, li kalama kepeken noka la, ona li ken ala kute e kalama lili. ona li awen, li awen e kon lon sijelo ona la, ona li ken kute sin e kalama lili ni: “mu-u, mu-u, mu-u…”
kalama ni li sama … seme? ken la meli li sona e ona. a! ona li sama kalama pi pilin sijelo!
“a a a (ona li mu musi) ni li kalama pi pilin sijelo mi a!” taso … nasa. ona li kute ala e ona lon tenpo ante pini.
pali o open. ona o weka.
meli en mije li lon “tomo suli.” (lon la, ona li lili, li suli ala). ona tu li pali li toki ala. sin la—
mije: meli o, sina ken kute e ni anu seme?
meli: nnn, seme a?
mije: kalama li lon. kalama nasa.
meli: mi ken ala kute e ona. taso…
mije: taso seme?
meli: ala … ken … tomo mi la, mi kin li kute e kalama nasa.
mije: a! ona li sama seme?
meli: ona li sama … kalama pi pilin sijelo. pilin mi la, ona li kalama taso pi pilin sijelo mi.
mije: (tenpo suli la ona li toki ala) ni a—ni li kalama sama: “mu-u, mu-u, mu-u.”
meli: mi … mi ken alasa toki sin tawa kulupu ma.
mije: tenpo suno ale la, mi alasa ni; taso ona li lon ala. a … o alasa sin.
meli: (ona li open e ilo toki) kulupu ma o, sina lon ala lon?
tenpo suli la, kalama ala li kama. pini la …
jan ma: jan mun o! sina lon! mi ale li kute e sina!
meli: mi tu li ken ni kin! kulupu ma o, ijo nasa li lon. o kute …
mije en meli li toki ala, li kon ala. kalama pi ona tu li lon ala. ona tu li kute e ni: “mu-u, mu-u, mu-u…” kute la, kalama li kama wawa.
mije: jan ma o, sina kute ala kute e kalama nasa?
jan ma: kute … a … ni li nasa ala. tenpo la, ilo toki pi poki sina li ken ni. ni li pakala lili ilo taso. o pilin ike ala. o weka e ni tan sona sina! mi ale [toki li pini]
taso … jan mun la, ni li sama ala lon. ni li ken ala pakala pi ilo toki. ilo toki li pini. meli en mije li kalama ala li awen kute e kalama pi pilin sijelo.
ona li kama suli. pilin pi ona tu la, kon ona li sama ni: sina taso ala li lon.
monsuta.
tenpo suno nanpa luka luka luka tu
meli li alasa toki tawa ma kepeken ilo toki. sike lili tawa li ken ante e ilo lon nasin ni: ona li ken toki tawa jan ante, tawa ma ante pi ma sike. taso ona li tawa sike e sike lili la … ala li lon. ona li kute e mu jaki taso tan ilo.
meli: ni li ken ala. kute la, jan ala li lon ma sike.
mije: mi alasa lukin e ma sike kepeken ilo oko wawa…. n, nasa. a!
meli: a seme?
mije: ale pi ma sike la, mi ken lukin e suno wawa lili. ona li … ona li sama … suno pi ilo moli wawa.
meli: mi wile lukin. … a … lon. ma ale pi ma sike la, suno lili mute li lon.
kalama ala. ona li sona e lon. utala suli pi ilo moli wawa li lon ma sike ale. jan ala li ken awen lon.
tenpo suno nanpa mute tu
ona li taso. lon pimeja suli la, ona li taso.
taso … ona li taso ala. kalama pi pilin sijelo li awen. jan tu li ken ala kute ala e ona.
tawa tenpo la, kalama li kama monsuta lili e ona. kalama li tan ijo pilin la, ona li pali ike ala tawa ona tu.
mije: kalama la … mi kama pilin e ni: ona li awen a e mi tu. ni li nasa anu seme?
meli: mi pilin sama. tenpo poka la, ni li kama lon lawa mi: mi kute e kalama ni lon tenpo pini, lon sitelen tawa sona. jan lili li lon insa pi mama ona la, ona li kute e kalama pi pilin sijelo mama. ni li kalama sama. ona li monsuta ala tawa mi … ona li suwi. ona li kama e sona pi mama mi lon lawa mi. (telo lili li kama tan oko).
tenpo suno nanpa mute tu wan
tenpo pimeja ni la, tenpo sama a la, ona tu li lukin e sitelen lape sama. tan mu-u pi pilin sijelo la, ona li ken kute e toki uta. ona li sama toki pi mama meli; kute la, ona li kama tan weka. ona li toki e ni:
kalama uta: “jan mun tu o. mi jan pi ma weka. jan pi ma sina la, mi ante ale. ken la, sona sina la, mi sama jan sewi. tenpo weka pini la, jan mi li pana e ma sina tawa jan sina. tenpo suli a la, mi en jan mi li lukin wawa e ma sina. mi ale li awen e sina, li wile e pona sina, li olin e sina. taso … tenpo mute a la, jan sina li utala, li pakala e ijo pona pi ma sina. pini la, ma sina li pakala ale; jan sina li … weka ale. sina tu li awen lon; mi awen lon poka sina, li sama mama tawa sina. sina taso ala li lon.
sina ken ijo tu. sina ken awen lon poki ni. sina ken awen jan mun. mi pana e moku e telo tawa sina. tenpo suli kama la, sina kama majuna li kama moli. sina moli la, jan pi nasin sina li lon ala. ni li pini jan.
taso ante la, mi ken kama e sina lon ma sin. sina ken kama jan pi ma sin. ma ni la, sina tu li ken mama e jan sin. tenpo suli kama la, ma sin ni la, jan mute a li lon: jan pona, en jan ike, en jan utala, en jan pi utala ala li lon. pona li lon. ike li lon. jan sin li olin e jan ante, li moli kin e ona. ken suli la, jan sin li kama pakala e ma sin ni kin. taso … ona li pali e pona suli kin. jan Atan o! jan Ewa o! wile sina li seme a?”
kalama uta li pini. ona tu li kama tan lape—li sona e wile ona.
mi pilin wawa tan ni: ilo ni li ken awen e tenpo.
mi kepeken la, ale li pini tawa. ale li kama sitelen.
suno li ken ala tawa lon tenpo awen. mi ken ala tawa, li ken ala lukin. ale li kama pimeja.
mi pilin monsuta tan ni: ilo ni li ken moli e ale.
jan Potunato li ike mute e mi la, mi utala ala, taso ona li kama toki ike e nimi mi la, mi o pakala sama e ona. taso sina sona ale e kon mi, li sona e ni: mi alasa pakala e jan la mi toki ala e wile pakala mi tawa ona. tenpo kama la pali li pini ale la mi pona sin; ni li ken ala kama ala. taso, tawa ni la, nasin pali o ken ala pakala e mi. taso, nasin pali mi li ken pakala tawa mi, la ona li nasin pi pona ala. mi ike e jan ike la, ike ante o tawa ala mi. alasa pakala mi li kama pakala e mi la pali li pini pona ala. jan ike li sona ala e wile pakala mi lon pini pali la pali li pini pona ala sama.
lon toki lon pali la mi pona taso tawa jan Potunato. mi awen pona e uta mi, sama mi pi tenpo ante. taso jan li sona ala e ni: uta pona mi li tan ken pi moli ona..
jan Potunato ni a, la ona li jan suli li ken monsuta tawa jan mute, taso mi ken pakala e ona kepeken nasin wan ni: ona li pilin pona tan sona mute ona pi telo nasa kili. ma Italija a la jan mute ala li sona wawa lon e ijo ni. jan ni mute li lukin pilin wawa tawa ni. taso, ona li sona mute lon selo taso. ni li tan tenpo li pona la ona li wile sama jan mani pi ma Inli anu pi ma Esakaki tawa lukin, taso wawa ona li lon ala. sitelen musi en musi pi kiwen kule la, jan Potunato li sama jan pi ma ona, li toki pakala e musi. taso ona li sona mute lon e telo nasa suli. ni li sama sona mi. mi kin li sona mute e telo nasa suli pi ma Italija, li esun mute e ona lon ken mi.
suno li tawa la, lon tenpo musi pi kalama wawa mute la, mi lukin e ona. ona li kama pilin seli mute tan ni: ona li moku e telo nasa mute. ona li len sama jan musi. linja kule li lon len sijelo ona. len lawa li sama nena li jo e kiwen kalama lili. mi pilin pona tan kama ona la mi wile ala pini luka wawa e luka ona.
mi toki tawa ona e ni: “jan pona Potunato o, kama sina li pona a. sina pona lukin mute a! a, mi kama jo e poki palisa. jan ante la ona li telo Amonsijato, taso mi la ni li ken lon ala.”
“seme?” ona li awen toki e ni: “telo Amonsijato? lon poki palisa a! ni li ken ala a! ken ala lon insa pi tenpo musi!”
mi toki e ni: “mi la ni li ken lon ala. pakala mi la mi esun kepeken mani wile ale li toki ala e esun tawa sina tan ni: sina lon ala. mi wile ala weka e esun pona.”
“telo Amonsijato a!”
“ni li ken lon ala.”
“telo Amonsijato a!”
“mi wile sona.”
“telo Amonsijato a!”
mi awen toki e ni: “taso jan ante li wile e sina la mi wile toki tawa jan Lusesi. ona li ken toki insa tawa sona pona la ona li toki e pona…”
“jan Lusesi li sona ala e ante pi telo Amonsijato pi telo Seli!”
“taso jan ante la sona ona li pona sama sona sina.”
“ala, mi tu o tawa.”
“tawa seme?”
“tawa lupa poki sina.”
” jan pona o ni ala, mi wile ala ante e pali wile sina. jan ante li wile e sina. jan Lusesi…”
“jan ante li wile ala e mi. o kama.”
“jan pona o ni ala. jan ante li wile ala e sina, taso mi la sijelo sina li ike mute. kon lupa li telo mute ike. kiwen kon ike li lon selo lupa kin.”
“taso mi o tawa. ike sijelo li suli ala. telo Amonsijato a! sina o pali e wile mi. jan Lusesi la, telo Amonsijato en telo Seli li ante ala.”
pini toki la, jan Potunato li luka e luka mi. mi len kepeken len sinpin pimeja kepeken len selo lon poka mi. ona li lawa e nasin mi tawa tomo mi.
jan anpa mi li lon ala tomo, li weka li musi tan tenpo musi. mi toki tawa ona e ni: mi kama ala lon tenpo pimeja la ona o weka ala tan tomo. toki mi li pona tan sona ni: mi lukin ala la jan ale li weka tan tomo.
mi kama jo e palisa suno tu tan poki, li pana e ni wan tawa jan Potunato. mi tawa e jan tawa tomo kipisi mute li kama lon lupa pi poki anpa. mi tawa lon nasin suli sike pi tawa anpa la, mi toki e ni tawa jan Potunato: wile mi la ona o pakala ala lon tawa. mi tawa mute la mi lon pini nasin, li awen lon ma telo ni. mi lon tomo anpa moli pi kulupu mi Monteso.
tawa noka ona li kama nasa. tawa la kiwen kalama pi len ona li mu.
ona li toki e ni: “poki palisa a!”
mi toki e ni: “ona li lon weka. taso, o lukin e kiwen, ona li sama len walo pipi, li suno lukin lili lon selo tomo.”
sinpin ona li lon sinpin mi la ona li lukin e mi kepeken lukin sike tu pi selo telo. telo li tan moku mute pi telo nasa.
ona li toki kepeken tenpo suli e ni: “kiwen ko, anu seme?”
mi toki e ni: “lon, kiwen ko li ken kama e kon ike a. sina mu kon tan ike sijelo lon tenpo mute seme?”
mi toki wawa e ni: “o kama. mi o weka tan ni. sijelo sina li suli. sina jan mani, li jan suli li jan pona li jan olin tawa jan mute. lon sina li pona, sama mi pi tenpo pini. jan mute li kama pilin ike tan moli sina. wile mi li lili mute tawa ni. sina kama ike mute la mi kama tan pi ike sina. mi wile ala ni. kin la, jan Lusesi li lon…”
“o pini!” ona li awen toki e ni: “mu ike li suli ala. ona li moli ala e mi. mi moli ala tan ike ni.”
toki mi la: “lon. lon. mi wile ala pilin monsuta e sina tan ijo pi suli ala. taso sina wile awen pona la o moku e telo nasa Meto lili. ni la kon telo li ike ala e sina.
ni la mi open e poki telo wan. ona li wan pi poki telo mute lon selo pi ko soko.
“o moku.” mi toki e ni la mi pana e telo.
ona li lon e telo lon selo uta li lukin e ni.
ona li awen lili la ona li tawa pona e lawa tan sona. ni la kiwen kalama li mu.
toki ona la: “mi moku, tan jan moli pi poka mi.”
toki mi la: “mi kin, tan lon suli sina.”
ona li luka sin e luka mi la, mi tawa sin.
ona li toki e ni: “tomo anpa ni li suli mute a.”
toki mi la: “kulupu Monteso a li suli li jan mute.”
“sitelen pi kulupu sina li seme? mi weka e sona ni. “
“noka jan suli jelo, li lon ma laso. akesi linja li uta e monsi noka la noka li pakala li anpa e akesi.”
“toki pi kulupu sina li seme?”
“Neniu senpune provokas min.”
(jan li pakala e mi la ike li tawa ona)
“pona a!” ona li pini toki.
telo nasa li suno lon lukin ona la kiwen kalama li mu. pilin mi kin li kama seli tan telo nasa. tawa la sinpin pi kiwen moli li lon poka la, poki sike telo mute li lon sinpin pi kiwen moli kin. mi tawa insa mute lon tomo linja. mi awen lili la mi luka wawa e insa pi luka sewi ona kepeken insa pi luka sewi mi, sama jan pona..
mi toki e ni: “kiwen ike a! o lukin. ona li kama mute, li awen lon selo sewi tomo sama ko kasi. mi lon anpa pi telo linja la telo li kama tan insa kiwen. o kama. mi weka lon ken mi. ike sina…”
toki ona la: “ike li suli ala la mi awen tawa. taso open pi tawa sin la, o moku sin e telo nasa Meto.”
mi luka ala e ona li pana e telo nasa Te Ka lon poki. ona li moku e ni ale lon tenpo pi esun kon wan la, lukin ona li suno sama seli. ona li mu wawa tan musi li weka e poki tawa sewi kepeken tawa nasa. mi sona ala e kon pi tawa nasa ni.
mi lukin e ona tan sona ala. ona li pali sin e tawa nasa..
toki ona la: “sina sona ala anu seme?”
toki mi la: “mi ni ala.”
“ni la sina lon ala kulupu.”
“seme?”
“sina lon ala kulupu Pali Tomo”
“mi jan pi pali tomo a. ni li lon.”
“sina? jan Pali Tomo? ni li ken ala lon a!”
“mi ni.”
“o sitelen e ni a,” ona li toki e ni: “o pana e sitelen sijelo mi.”
“ona li ni.” mi toki e ni la mi luka e ilo pi tawa ko tan insa pi len selo.
“sina toki musi a.” ona li toki e ni la ona li tawa monsi lili. toki awen la: “ taso mi o tawa telo Amonsijato.”
“o ni.” mi toki e ni la mi len sin e ilo lon len selo li pana e luka mi la, ona li pana e sijelo suli tawa luka palisa mi. mi tawa sin tawa telo Amonsijato. mi tawa lon lupa sike mute, li tawa anpa, li tawa, li tawa anpa sin, li kama lon tomo pi anpa mute. kon tomo li jaki mute la suno mi li suno lili taso li suno seli ala.
lon weka la, tomo lili ante li lon. sinpin ale tomo en sewi tomo li pali kepeken kiwen pi sijelo moli, sama tomo anpa pi kulupu moli pi ma tomo Paki. sinpin ona tu wan li awen leko sama tomo moli Paki. lon sinpin ante la jan li weka e kiwen moli tan sinpin la ona li lon ma sama jaki, li kama nena pi suli lili. kiwen li weka la lupa lili li lon. tawa insa la suli ona li sama suli pi noka tu tu. suli poka li sama suli pi noka tu wan. tawa sewi la suli li sama suli pi noka luka wan anu tu. lon pi lupa ni li tan ala wile jan, li tan insa pi palisa suli tu. palisa suli ni li awen e sewi tomo.
jan Potunato li sewi e palisa suno la, ona li wile lukin e insa lupa, taso ona li ken ala. suno li lili taso la pini monsi lupa li len.
mi toki e ni: “o awen tawa insa. telo Amonsijato li lon ni. jan Lusesi la…”
“ona li sona e ala.” jan li pini e toki mi li toki e ni la ona li tawa sinpin nasa. ni la mi tawa lon poka pi monsi ona. tenpo lili la ona li kama sona e pini lupa. tawa ona li pini tan kiwen la, ona li awen tan pilin nasa tan sona ala. tenpo poka kama la mi awen e ona lon sinpin kiwen kepeken linja kiwen, kepeken lupa kiwen pi awen linja lon sinpin.mi sike e linja lon sijelo ona la mi awen e ona kepeken tenpo lili. ona li sona ala e kama ni la ona li ken ala pini e pali mi. mi weka e ilo palisa li weka tan lupa lili.
mi toki e ni: “o luka e sinpin la, sina ken sona e kiwen ko lon ni. ona li telo mute a. mi o toki sin e ni: sina o weka. sina wile ala a anu seme? wile ala la mi o wekae sina lon ma ni. taso, nanpa wan la mi wile pana e pona ale mi tawa sina.”
“telo Amonsijato a!” jan li awen pilin nasa la ona li toki e ni.
“a.” mi toki e ni tu: “telo Amonsijato.”
mi toki la mi pali mute lon kiwen moli. kiwen ni li weka la kiwen leko en ko pi pali sinpin li kama len ala. kepeken ni kepeken ilo pali mi la, mi open pini e open lupa la open li kama sinpin.
supa nanpa wan pi leko sinpin li pini ala la nasa mute lawa pi jan Potunato li weka. mi kama sona e ni tan ni: mu lili pi tenpo suli li kama tan lupa. mu li tan ala jan pi lawa nasa. mu li pini la kalama ike ala li lon tenpo suli. mi pana e supa nanpa tu lon sewi pi supa ante, e supa nanpa tu wan, e supa ante. pali pi supa ni li pini la mi kute e kalama wawa tan supa kiwen. kalama li lon tenpo mute. mi wile kute e ona tawa pilin pona la mi pini e pali mi li awen lon sewi pi kiwen moli. kalama li pini la mi pali sin. mi wile ala awen mute la mi pali e supa sinpin nanpa luka, e supa ante, e supa ante ante. ni la supa sinpin li kama lon sijelo sewi mi. mi pini sin e pali. mi lon e suno lon sewi sinpin la mi ken suno lili taso e selo pi jan insa.
kalama suli mute li kama wawa tan uta pi jan awen, li pakala e pilin kute la mi tawa monsi wawa. tenpo lili la mi awen tan pilin… mi kama lete tan pilin monsuta. mi luka e palisa utala mi, li tawa e ona lon lupa lili sinpin tan wile utala, taso mi sona sin e ijo lon la pilin ike li weka. mi luka e selo pi tomo ni la mi pilin pona tan pali mi. mi kama sin tawa sinpin pali. mi toki tawa kalama jan. mi mu sama e kalama ona. mi mute e kalama. suli kalama en wawa la kalama mi li suli tawa ona. mi ni la kalama ona li pini.
mun li lon sewi ale la, pali mi li poka pini. supa sinpin nanpa luka tu wan, en supa ante wan, en supa ante tu li kama lon. mi pali mute e supa nanpa pini la leko wan taso li lon ala sinpin. tawa ona li wile e wawa mute mi. mi kama lon e ona, taso mu musi sama soweli suli li kama tan lupa la supa lawa mi li sama palisa tan ni. pini mu la toki pi kalama ike li kama. mi la toki li ante mute tan toki pi jan suli Potunato. toki li ni:
“a! a! a!… e! e! e!… ni li pali musi a, li musi mute. mi en sina o musi mute tan ni lon tomo sina… a a a… lon moku pi telo mi… a a a”
mi toki e ni: “telo Amonsijato a!”
“a a a… a a a… lon a, telo Amonsijato. taso tenpo mute li tawa. jan li wile e mi tu lon tomo anu seme… meli Potunato en jan ante a. mi tu o tawa”
mi toki e ni: “lon. mi o tawa.”
“tan pona pi jan sewi a, jan Monteso o!”
“lon!” mi toki e ni tu: “tan pona sewi a!”
mi toki la mi kute ala e toki ante. mi wile ala awen tan ni la mi toki wawa e ni:
“jan Potunato o!”
toki ante li kama ala. mi toki sin e ni:
“jan Potunato a…”
toki ante li awen kama ala. mi pana e suno tawa lupa sinpin. ona li tawa lupa la kiwen kalama taso li mu. mi pilin ike tan kon telo tomo la mi pini e pali lon tenpo lili. mi pana e kiwen leko tawa lupa ona, li awen e ona kepeken ko. lon sinpin sin la mi lon sin e kiwen moli mute. lon tenpo sike MMLL la jan ala li tawa e ni. Ripozu en paco!
“tenpo li tawa,
taso jan ale li
ken ala pana.
ale li sama,
lon nanpa wan anu luka tu wan a.”
mi toki lili e ni li kama tawa tomo tawa linja.
insa jan ale la, linja lon li lon. linja ni li ken kalama. mi ken pilin e ona li kute e kalama ona.
mi tawa lon ma mute li pali e kalama suli tan kalama linja pi jan ale pona.
tenpo lete li poka pini. mi toki insa lon nasin mi.
tenpo lili li kama la mi kama lon insa pi tomo tawa linja.
mi awen. jan mije suwi lon poka mi li lukin e mi.
“meli pona o. suno ni li pona mute, anu seme?” ona li toki.
lukin mi pi laso kasi li lukin e lukin ona pi laso sewi.
“a, sina wile toki la mi ken.”
ona li toki e ni: “ni la… mi ken ala ken kama sona e nimi sina?”
mi awen lili li kama toki. “mi jan Sesilija.”
“nimi pona a… mi pilin pona tan ni: mi kama sona e sina. nimi mi li jan Okasu.” ona li toki.
“nnn.” mi kalama.
ona li toki e ni: “sina kama tan ma seme anu tawa ma seme? lukin mi la sina kama ala tan ma ni.”
mi toki e ni: “tawa ma tomo suli… anu ala. mi jan tawa. tenpo ale la mi tawa ma pi pilin mi.”
mi tu li awen toki.
ona li jan pona tawa lukin. mi wile alasa… mi pini e lukin mi.
mi lon ma pi insa lawa. linja lon pi jan Okasu li lon sinpin mi. mi pana e luka mi tawa ona.
mu…
mu… mu… mu…
kalama li kama suli. ona li kama suli mute.
“o… o ala!” mi toki.
linja li pakala. ale li weka. mi kama sin tawa ma lon. taso…
lukin pi jan Okasu li weka e suno ona.
“a…“
jan Okasu li kama anpa.
jan ale lon tomo tawa linja li kalama suli.
“ona li moli! o tawa ala! sina moli e ona!”
mi pini. “o… awen…” luka mi li tawa sinpin mi.
mu…
jan wan ante li kama anpa. linja ona li pakala.
“mi… wile ala e ni…“
tomo tawa linja li pini.
mi weka.
…
“sina pilin e wawa ni, anu seme?” ijo li tawa insa mi.
“sina… kama sin. mi toki e ni: mi wile ala kepeken e wawa moli.” mi toki insa.
“taso nasin ale la sina pali e ni. ala la… sina ken kama sona.” ona li toki.
ona li kama len. mi kon lili li open e lukin mi.
mi lon supa, lon tomo pimeja. a, ni li tomo pi alasa sona ike.
mi ken ala tawa e luka mi, tan ni: linja li lon ona. pali pona a…
taso jan ante li lon ala lon tomo.
mi awen. mi alasa sona e ijo insa mi.
mi toki insa e ni: “sina o… soweli pimeja o… sina wile e seme?”
ona li kalama musi. “o kute. mi jo e linja lon sina. sina pali ala sama toki mi la, mi pakala e ona. ni la sina moli, taso mi moli ala. mi kama wawa mute li pana e pakala li moli e jan. ona li ken ala pini e mi. sina wile ala e ni, anu seme?”
“sina toki e lon ala a.”
“ni la… o pilin.”
mi pilin e ni: linja lon mi li tawa wawa. lukin mi li kama pimeja. sijelo ale mi li pilin pakala. uta mi li ken ala kalama.
ale li pini la mi kon suli li toki e ni: “pona… taso, tenpo ni la sina moli ala e mi. tan seme?”
ona li toki musi e ni: “ken la mi wile e pali lili tan sina… anu mi pilin musi.
o pali anu pali ala. jan li tawa tawa tomo ni. o moli e ona.”
“mi ken ala kepeken e luka mi!”
“o kepeken ala e ona. sina ken pakala e linja lon jan kepeken lukin sina taso.”
“nasin seme a-” lupa li open.
mi alasa e wile. mi sona ala.
“o pali anu pali ala.”
taso, wile mi li ken ala ante e ijo.
mi awen lon la mi ken alasa e nasin weka… taso… ona li lon anu lon ala?
jan li kama lon tomo. mi lukin e lukin ona li pilin e ale.
tawa ona la, mi monsuta taso. mi pana anu pana ala e sona la, ona li wile pakala e mi.
ken la mi monsuta. lukin mi li suno. mi wile ala wile e ni?
jan li kalama wawa li kama anpa.
tenpo kama lili la jan ante li kute e ni li kama lon tomo li lukin e ale. mi toki e ni:
“o kalama ala. o weka e linja lon luka mi. ala la… lon sina li sama jan ni, lon anpa.”
ona li pali e toki mi.
“mi tu o tawa weka tan tomo suli ni. o kama lon sinpin.”
jan ante lon nasin mi li toki ala, taso ona li lukin suli e mi.
mi tu li tawa weka li pini.
“sina pona.” mi uta musi.
lukin mi li suno. jan li kama anpa.
tenpo pimeja li awen lon.
mi kute e kalama pi soweli pimeja:
“sina… pona tawa mi. mi ante e toki mi. tenpo ni la mi wile ala moli e sina.”
“o sona e ni: mi tu li wan.”
open tenpo li tawa nasin lon jan ni · nasin ona li suli, li nasa tan open ni · nasin, la nasa o pona · nasin, la jan li ken sona · open li kama, li kama mute · tan ona li tawa pakala ma · open ona li pakala ala, li pona taso ala, li pona mute mute a · taso pona o pini o weka kin · pini pona en pini tenpo li tawa jan ni lon tenpo ni sin · ijo seme li open e ike ni? a, ike ni li kepeken tan mute, li kepeken nasin pali wan · ni li tan nasin pali ni : kama sin ilo li pali wawa e ilo sin mute · ilo li mute · ilo li sike, li supa, li wawa · ilo li ilo · kepeken ona o awen tawa · ale li tawa · ilo li sama ijo ale ante · ilo li pali e sin mute tawa ale · ilo o pali ni · weka pali li ken ala · ilo li pona ala pona? pona ala · ilo o lon ala lon? lon ala · taso ilo li lon tan jan ante · pilin ona en wile ona li wawa, la ilo ale o kama sin · pilin ona en wile ona li suli, la ilo ale o pini ala · wawa ilo o awen kama suli tan wile, tan pilin · ni o ike taso tawa jan ni ·
suli ilo li ante e ijo mute · ilo o pini e kasi sin · kasi li open ala, li kama sin ala tan ilo · kepeken ilo li moli e kasi · kulupu ale li pini e ni kepeken ilo · kepeken ilo li jaki e sewi laso kin · kepeken ilo li lon e jaki kulupu namako · jan mute li toki mute e ni tawa kulupu : ｢ilo o suwi taso · ilo ale o pini e pali wile · ilo ale o suli e tenpo musi tawa jan｣ · taso toki ona ale li lon ala, li toki jaki · ilo li pini ala e pali jan · ilo li lili ala e pali jan · ilo li lili taso e jan pali · jan pali, la mute ona li awen kama lili tan open ilo · ilo li open, la jan mute o nasa, o weka e wile ona ale · jan li wile ala e ni · jan li wile pakala e ilo · jan li wile moli e ilo · tawa ni, la jan o sona e sona ilo ale · jan o open e kama sona ona · jan li kama sona e ken toki tawa ilo · jan li kama sona e nanpa lili tawa ilo · jan li kama sona e lawa tawa ilo · kama sona jan li kama pini, la jan li open utala e ilo ale ·
jan li tawa ilo nanpa ona · jan li open e ilo nanpa · ilo nanpa, la nena lili ona li kama suno · ilo nanpa, la poki suli ona li walo · ilo nanpa li open e sona sin tawa jan · jan li kepeken ona · luka jan li tawa nena lili, li tawa e nena lili tawa anpa · pali ni li pini, la ilo nanpa o pana e ilo toki ona tawa jan · jan li lukin e ni · jan li open kepeken ilo toki tawa wile pini suli · jan li open toki e alasa sona · alasa sona ni li pana e sona ken tan ilo toki, tawa jan ·
jan li toki e ni tawa ilo : ｢toki a｣ ·
ilo li toki kin · ｢moku! sina toki!｣
toki ilo ni li nasa lili tawa jan · taso jan li awen pana e wile sona tawa ilo · jan li sitelen e toki ona kepeken nena lili lon ilo nanpa ona · ｢ni li pona · o pana e sona tawa mi a · mi pana e loje tawa jelo, la kule seme li lon?｣
ilo li toki e ni tawa jan : ｢kule ni li palisa palisa｣ ·
jan li tawa e lawa ona · nimi ni li nasa taso, li kepeken ala kon pona · jan li toki ike e ni tawa ilo : ｢pali toki ni li pakala · palisa li kule ala｣ ·
ilo toki li awen · awen ona li kama pini, la ilo li open sitelen, li toki e ni tawa jan : ｢palisa li palisa sina · mi li toki e ni tawa e sina : mi li lon ma moku suli, la mi li toki ni : wile moku li tawa suli · sina li toki : o ona li wile tawa tenpo moku suli · mi li lon ma moku suli, la mi li toki ni : wile moku li tawa suli · sina li toki : o ona li wile tawa tenpo moku suli｣ ·
jan o kama e pilin jaki tan toki ilo · pilin pakala mute li tawa jan · pilin ante ala o lon tan ni · jan li awen e toki, e ni : ｢sina toki ike! sina kepeken nasin ike tan nimi sina pakala｣ · jan li awen · tenpo lili li tawa weka · pini ni, la ilo li toki insa, li sona e kon nimi jan ·
ilo toki li toki sin e nimi ni : ｢ala · mi li kepeken e nasin pi pona｣ ·
jan o mu wawa e nimi ni taso tan toki pakala ilo : ｢ni li toki pona ala! ilo li sitelen e nimi, la nimi pana li jaki taso, li ken ala suwi! pali li tan ilo taso, la pali li lon ala tawa pona jan · ilo o! pali pakala sina o pini · sina o pini sama · ike taso li sina! sina o moli taso!｣ jan li kama e palisa kiwen ona tan nimi ni · jan li tawa e palisa kiwen tawa ilo nanpa · jan li utala e ilo nanpa kepeken palisa · tawa palisa li pini, la ilo nanpa li pakala wawa · ilo nanpa en ilo toki ona li lon ala · jan li moli e ni · jan li pilin pona tan moli ilo · ni li lon · taso jan li pini ala e utala ona · jan li wile moli e ilo wan ala · jan o wile moli mute e ilo ale · tomo suli li pali e ilo pali sin, la jan li seli e ona · jan li pona e ilo pakala sin, la jan li pakala, li utala e ona · ilo ante li lon tomo ma tawa, li moli e kasi palisa, la jan li pana e poki lili tawa insa ilo · tenpo li tawa, li weka, la poki lili ni li kama seli sin · seli sin ni li ala e ilo ante ale · ni li pona mute tawa jan · ilo, la pali jan o tawa pini ilo ale · jan li alasa e jan sin ante tawa utala wile ona · jan li pana mute e nimi ni tawa ona : ｢jan o kute! ilo li pakala e kulupu · ilo li lili e lon · ilo li suli e wile moli · ijo ike ale, la ona li tan ilo! sina wile pona, la sina o pakala e ilo ale! ilo o moli! o moli e ilo a! o ni lon poka mi! mi en sina ale, la jan ala o ken pini e pona kama! ilo o anpa! jan o suli! ni o lon｣ · jan ale li kulupu · jan ale o kulupu · ni li wile jan · taso jan o ken ala ken pini e wile ona? utala ni o kama pona tawa jan anu seme? mi ale o wile sona e ni ·
⁂
pali ale ni li tan jan wan, la jan ante mute li lukin, li awen lukin e ona · mute ona li luka tu · ona li awen lukin e ijo wan · ijo ni li wawa tawa wile lukin ona · ijo ni li seme? ona li ilo · sona nanpa suli li tawa ilo ni · insa ona, la ilo ni, la ilo li lukin e ma e kon e ijo ale · taso ilo ni, la ma li lon ala · ilo ni, la ale ona li powe taso · jan ante mute li lukin e ilo ni · ilo ni li jan wan · jan ante mute li sona e ni ale · jan ante mute li lon e sona nanpa suli · jan ante mute li pana e sona nanpa suli tawa ilo ni ·
pona pilin ona, la jan nanpa wan li weka e weka toki kepeken toki ona : ｢ilo mute li open kama, li weka kin · ilo mi ale li awen ala tan ni : ilo ale li wawa ala lon tenpo pini · taso ilo ni li wawa suli a! ilo ni o pona mute · ilo ni li pona sama tawa mi｣ · jan nanpa tu li toki kin e ni : ｢mi pilin sama · ilo ni li kepeken pona ale · pona sin li ken ala tawa ona｣ · jan ale o tawa e lawa ona · jan nanpa tu wan li mu e ni : ｢a mi mute o poki e mani mute!｣ jan nanpa tu tu li tawa e uta ona kepeken suwi wawa · ona li wile taso e ken lon ilo sin ni · jan nanpa tu tu, la toki ona li suli e ken suli lon ilo ni : ｢poka sina, la mi ale li pini pali e ilo tawa wawa ken jan · sina ale li sona e nasin · ilo o pona mute, la ilo o pilin ni : ona li ilo ala, li jan taso · ilo ni li pona · ona o ken ale tawa jan esun kulupu · wawa ona li mute · pali ona li tawa pali jan ale kepeken pilin nanpa · sin ni li tawa ona lon · ilo ante, la ona ale li kepeken ike wan anu ike mute · taso ilo ni li ike ala, li pona taso tan ni : ona o pilin sama jan · pilin jan ona li ni : ilo ni li ike pilin tawa ilo · ilo li pilin ike tawa ilo, la ilo li sama jan｣ · jan mute ante li sin e mu ona · ona ale li olin e ilo ni sin, e mani sin ·
jan nanpa luka li pana e wile sona wan tawa jan nanpa tu tu · wile sona li ni : ｢mute li ken a · taso ilo ni li lon ma powe ona, la ilo toki ona o ike taso tan seme? ma powe ona, la ilo toki o ken ala wawa tan nasin seme?｣ jan nanpa tu tu li pana e sona wile : ｢ilo o kama sona e pona tan ike · ilo li lukin e ike, la ilo li pilin pona · ijo ante li ike mute tawa ona, ilo o kama pilin e ni : ona o pona suli · ni, la ilo li alasa sama nasin jan · tenpo ale, la mi wile e nasin jan tawa ilo!｣ ni li nasa pona tawa ona · jan nanpa luka wan li pini e toki kulupu : ｢mi wile tawa supa lape mi! lape o kama · tenpo poka kama, la mi ale o lon e esun sin tawa ilo ni · taso tenpo ni, la musi o pini · ijo pini li ni : ilo ni, la jan wan o pini e lawa ona!｣ jan li tawa weka · mani ona o kama kin lon tenpo poka · jan nanpa luka tu, la ona li luka e nena loje lon poki ilo · nena loje li tawa anpa · tawa anpa, la ilo li lape ·
tenpo ni la, kon telo li kama lon poka. mi kama sona e ni: ni li tenpo pini mi. sona ni li pakala e lawa mi. pilin lawa mi li sama lape anu weka pi ale lon. monsuta suli lon la mi sitelen pakala e nimi lili ni. mi sona e ni: sitelen ni li pali pini mi. taso mi pana e lipu ni lon poki ante la, ken la, ona li awen lon. wile ni mi li kama la . . . ken la, ike ni li kama ala lon tenpo nanpa tu.
jan li toki e ni lon ma pi mute lili: kon telo li ken kama sona kepeken nasin. mi sona ala e ni: ni li lon ala lon ? ni li lon la, ike li tawa lon ma li wile anpa e mi ale. ken la, ni li toki musi taso. ni li toki musi ala la mi monsuta e ni: ijo li lili e ike ale ante. ike ale ante la, ijo ni . . . ijo ni li suli wawa a.
ijo ni li pakala e mi. ken la, ijo ni li sona. ken la ijo li sona ala. ni tu li sama, li ante ala e sona sin mi ni: tenpo moli mi li kama. sina lukin e lipu ni la o sona e ni: mi ken ala pali. sina lukin e lipu ni la o sona e ni: mi ken ala pali. ona li jo ala e sijelo. ona li pali ala e sijelo moli. jan kama li kama ala lukin e sijelo e kon ni. ni tu li tan ni wan: ijo li wile ala e alasa ona. taso mi sona ala e ni: ijo ni li seme ? kin . . . mi monsuta e ni: jan li ken alasa e ijo awen seme pi sijelo mi ?
mi alasa utala e ona kepeken seli lon tenpo pini. mi pilin e ni: mi alasa ni lon tenpo pi pini mute la, ona li pali pona. kon moli ni li kama lon ala. taso mi pana e tenpo mute tawa ona. kin mi sona e ni: sina ken ala awen lon poki lili. jan li alasa e ni. tan ni la, mi taso li lon a. sina ken kepeken len selo ale pi wile sina lon lupa tomo. ni li pali ala. kon li kama alasa e nasin lon tenpo ale. ona li alasa e nasin lon tenpo ale a: taso ona li ken ala alasa e nasin la . . . sina len ale e lupa tomo la, mi pilin e ni: ona li moku ale e tomo.
sina ken kama sona e ni kepeken pali lili: lipu ni li ken ala toki e nasin pini mi, tan ni: mi jan sitelen ona. kin ona li ken ala toki e nasin pini pi kon telo: sina o kama sona e ni kepeken lawa sina taso. tenpo ni la, mi lon tomo. tomo ni li awen li pakala taso, la, o pilin pona. tomo ni li pakala ala la o tawa weka. o tawa suli kepeken tenpo lili a. ken la tomo li weka ale. ken la lipu ni taso li awen. ni li lon la tenpo kama pona li ken ala lon.
nasin wan li lon lawa mi. lipu ni la, ike la, mi ken ala toki e kama ona. sona ni li moli lon poka mi. mi ken taso toki e nasin wile mi. kon ni li kama lon tomo kepeken lupa lili ale. mi pana e lipu ni tawa ma ante. ma ni li lon ma ante tan utala kama ni. mi pini e ni la, mi seli e tomo ni ale. kon ni walo pimeja pi pimeja walo li alasa moku e tomo mi; seli o moku e tomo e kon. tenpo nanpa wan la, mi ken ala pakala e kon kepeken seli—taso tenpo ona la, mi mute li kepeken palisa lili suno taso. tenpo ni la tomo ale ni li kama seli. tenpo pimeja ni la, pini la, kon ni li kama moli.
ona li moli ala la . . . jan sewi o awen e mi ale.
mi tawa lupa lukin mi la, jan wan li awen. ona li lukin e lupa mi. pona la, suno ala li lon tomo mi. ona li ken ala lukin e mi. ni li kama lon tenpo pimeja mute. tenpo pimeja tu wan la, ona li lukin e lupa mi. mi sona ala e ni: ona li lukin tawa seme. mi toki insa lon ni: mi jo ala jo e jan ike? taso mi ken ala kama sona sin e jan wan. ni li nasa. nasin pali ona li ni: insa pi tenpo pimeja li kama la, ona li awen e tomo tawa ona lon poka tomo mi. ona li tawa weka tan tomo tawa ona. ona li awen li lukin e lupa mi. ken la ona li wile sona e ni: mi lon ala lon tomo mi. ken la, ona li jan lanpan. tenpo ni la, mi lukin e ni: ona li ante lili e nasin pali ona. ona li kepeken e ilo pi lukin wawa. mi pilin monsuta la, mi len lon monsi len lupa. mi sona ala e ni: ona li wile e seme.
“telo li kama tan sewi. mi pilin ike. mi en jan pona mi taso li sitelen e sitelen lon tomo sona. mi toki ala. mi tu li sitelen kepeken ala toki.
tomo sona ni la mi en ona li lon kulupu sitelen. mi mute li pana e lipu sitelen lon tenpo musi kama. ni la mi en ona li wile pini sitelen e sitelen.
mi lukin e ona la, ona li pini e sitelen tu. mi pilin ike tawa mi. mi kin li ken sitelen e sitelen luka. taso mi pini ala.
mi sitelen la mi pilin e ni: jan ante li lawa tawa mi. kin la mi pilin e ni: jan ale li pilin ike tawa pilin mi tawa sitelen mi a. ni la, mi ken ala tawa e ilo sitelen. mi pilin e ni: mi ken ala sitelen. mi jo ala e ken sitelen.
‘a!! sitelen ni kin li ike a!!’
mi toki li pini sitelen li kama sin e lipu mi.
‘jan Misaki o, sina weka e ni kin anu seme? taso sitelen sina li pona tawa mi’
‘jan Lewi o, sina sona ala a.’
mi pilin ike li toki e ni.
telo sewi li kalama lili lon lupa tomo. mi lukin e lipu lon tenpo sin. taso mi ken ala. luka mi li tawa ala. ken sin mi li weka tan lawa mi sama kon.
toki pi jan Lewi li pona tawa mi. taso mi pilin pakala. tenpo lili pini la mi toki e ni: ‘jan Lewi li sona ala a.’ toki ni li pakala e mi. mi ken ala tan seme? mi kama pilin ike mute.
tenpo ni la mi pilin e ijo lonmonsi mi. mi lukin tawa monsi. taso ijo ala li lon. ilo tenpo li awen kalama lili lon sinpin tomo. taso kalama ni li kama suli.
mi pilin monsuta. mi lukin e lipu mi li lukin pali e linja sin. taso mi lukin e ijo lon pini lukin. mi lukin e ona li kama nasa. sitelen pi pipi lili wan li lon sewi lipu mi. pipi li tawa lon nasin linja mi. pipi li lon linja la linja ni li weka. pipi li moku e sitelen mi.
‘tan seme…?’ mi lukin weka e pipi. taso luka mi li pini tawa. pipi li kama suli mute. ona li lape ala. sijelo ona li kama sijelo ante. tenpo lili la ona li kama lukin sama sitelen ni: mi pini e sitelen lon tenpo pini. ona li kama soweli nasa mi. pipi li jo ala e luka waso e linja pilin lon sinpin. pipi li jaki lukin.
mi tawa monsi tan monsuta. pipi li weka tan lipu mi li tawa poka mi. mi lukin weka. taso mi ken ala tawa e sijelo mi. pilin mi la mi ken ala tawa tan ni: ona li lawa e mi. sijelo mi li sama kiwen li tawa ala. lukin tomo li kama linja ike li kama nasa. tenpo pini la luka mi li jo e ilo sitelen. taso ona li weka
mi toki lili e ni: ‘jan Lewi…o pona e mi…’
taso ona li ken ala lukin e pipi ni. ona li awen sitelen e sitelen.
mi pilin monsuta mute a. pipi…monsuta li lukin e mi. luka suli ona li pana e mi tawa uta ona. uta mi li ken ala kama jo e kon. mi pilin e lupa uta ona. ona li pilin e sijelo mi, e insa mi kepeken lupa ona. mi pilin e telo ike e uta wawa. ona li moku e mi. pilin mi li weka…
…mi lon. mi lukin lon pimeja. mi lon ma nasa. ale li jaki mute. mi kon e kon poka mi. …ni li ike mute a. kon li sama ni: jan moli li kama jaki. sewi li loje. suno li kama weka.
ijo jaki mute li lon nena weka. ona mute li … jan anu seme? ona mute li nasa li tawa poka mi li lukin pilin e mi a. mi lukin e ona mute li pilin ike. ona mute li lukin sama sitelen pini m. ona wan li jo ala e oko. ona ante li jo ala e sinpin e luka. ona mute li jo ala e ijo. ni li nasa lukin a. ona mute li toki ala. taso mi ken kute e toki ona.
‘mi mute li sitelen weka sina. sina pini pali e mi mute. sina moli e mi mute. sina moli e mi mute a.’
tenpo ni la sijelo mi li kama lili. …ala. ona mute li kama suli. jan pi sinpin ala li lon selo sike. sinpin monsuta pi ona mute li kama. ona mute li wile e seme? mi sona ala e ni. mi lukin weka tan ona mute. taso noka mi li tawa ala.
kama la… pipi suli li lon insa kulupu pi ona mute. pipi li moku e ona ale. ona ale li tawa insa pipi. pilin monsuta mi li kama suli. uta suli li kama poka mi. ona li pilin e mi. mi ken ala kon lon tenpo sin.
‘mi…mi ken ala weka a……’
pipi monsuta li moku e mi lon tenpo sin.
mi tawa insa ona. mi ken ala lukin. mi pilin monsuta. mi pini e oko mi. kama la…
lukin mi li kama suno. kon jaki li lon ala. mi moli ala. mi kama lon tomo sona mi. lipu mi li lon poka mi. kalama pi ilo tenpo li kama pona. jan Lewi li awen sitelen e sitelen.
…taso mi ken ala jo e ilo sitelen. mi pilin e ni: kon mi li ante.
mi kama lon tomo sona. taso tomo ni li ante anu seme? mi pilin nasa. mi lukin e lipu sitelen mi. ona li kama pimeja. mi pilin e ni: ma ni li lon ala li sama ijo lape.
jan Lewi li toki e ni: ‘jan Misaki o, sina pona ala pona?’
mi kute e toki pi jan Lewi. taso mi pilin e ni: toki ona li tan weka.
mi open e uta mi tan toki. taso mi ken ala kalama. mi ken lukin taso e ona.
ona li kama nasa. sinpin ona li lon ala. ona li jan Lewi lukin. taso sinpin ona li weka.
ni li ijo pi kama nasa. mi tawa anpa tan supa. mi tawa monsi kepeken luka ike mi li awen lukin e jan Lewi. taso ona kin li lukin e mi. jan Lewi li jo ala e sinpin. taso mi ken pilin e lukin ona.
‘jan Misaki o, seme li lon?’ toki ona taso li sama jan Lewi. taso…taso ona li sama jan pi sinpin ala.
mi tawa wawa tawa lupa tomo. mi lukin open e lupa. taso lupa li tawa ala. mi pilin monsuta li lukin e monsi. kama la, lukin tomo li kama linja ike li kama nasa lon tenpo sin. tomo sona li lon ala tawa mi. ma ni li weka anu seme? mi pilin e ni: lawa mi li moli. taso sijelo mi li tawa. mi ken ala kama sona e tan. mi ken pilin e ni: telo loje li tawa insa mi. sinpin tomo li kama linja. supa sewi li kama anpa.
‘jan Misaki o, sina o weka ala. mi mute li lon poka a.’
toki pi jan Lewi li kalama lon tomo. kalama ni la mi kute e kalama pi luka waso pipi kin, tan ma pi ijo sitelen. mi lukin e kalama e lipu mi. pipi lili mute li kama tan lipu mi. pipi mute li tawa lon ale tomo li pimeja e kon.
‘o kama… o kama…’
kalama ni li kalama lon insa lawa mi. ma ni li lon ala. pipi monsuta li moku e mi lon tenpo pini. pipi li moku e tomo taso ala e jan Lewi taso ala. pipi monsuta li moku e mi e tomo e jan Lewi e sona mi. ale li moku tawa pipi monsuta a!
mi lukin weka tan ma kama pimeja…tan insa sijelo pipi. mi tawa wawa mute e luka mi. taso mi k”
‘a!! sitelen ni kin li ike a!!’
mi toki li pini e sitelen li kama sin e lipu mi.
mi sona ala e nanpa ni: mi moli e ona. kama la mi open sitelen e toki ona.
ante: sina ken ante e pali tan lipu ni tawa wile sina. sina ken esun e pali pi lipu ni e pali sin sina tawa mani anu ijo ante.
taso:
tan: sina pana/esun/ante e pali tan lipu ni, la sina o pana e nimi pi mama pali. sina ante e ijo lon pali, la o toki e ante sina. ni li lon ala la o toki ala e ni: “mama pali li wile e kepeken mi.”
pana sama: sina ante e pali tan lipu ni, la pali sin sina o kepeken lawa sama ni.
lawa sin ala: sina ken ala pana e lawa kepeken sin. sina ken ala kepeken ilo tawa ni: jan ante li ken ala kepeken pali lon lawa kepeken ni.
kulupu Creative Commons li ken ala e ante toki ni. ni li toki lili taso. sina wile sona e lawa ale, la o lukin e lawa suli lon ni:
