weka a tan ma sike ni la, ijo li lon sewi pimeja li sike e ma sike sama mun. lon la, ijo ni li poki kiwen; insa ona la, meli en mije li lon. tenpo suno luka luka pini la, ona li kama lon ni, li pali tawa sona: ona li awen e kasi, li nanpa e ijo jaki lili, li lukin ilo e kon pi ma sike. ona o awen tawa ni: ilo tawa li kama. sona ona la, ilo tawa li kama lon tenpo suno mute tu wan. tenpo awen li pona tawa ni: ona li ken pini e pali ona pi kama sona. taso ona li wile a kama sin lon ma! jan li wile ala awen lon pimeja suli.
tenpo suno nanpa luka luka wan
ilo toki li kalama: jan mun o, jan mun o, sina lon ala lon?
meli mun li toki: lon a! jan ma o, sina seme?
jan ma: ale li pona! taso … lon la, ale li pona ala tan [mu jaki pi ilo toki]
meli mun: toki sina li kama pona ala tawa mi. mu jaki mute li lon. ken la, suno li wawa li pakala e toki weka. taso … sina toki e ni anu seme: “ale li pona ala”?
jan ma: sina kute pona [mu jaki] kama lon sike suno wan tan [mu jaki]
tenpo ni la, mije mun li toki: jan ma o, jan ma o, mi tu li ken ala kute pona e toki sina. sike suno wan la seme a?
jan ma: jan li kama sin e sina lon ma. ilo tawa li ken ala kama tan [mu jaki] utala suli lon ma [mu jaki] suno wan. ni la, sike suno wan la, sina ken kama sin lon [mu jaki; toki li pini]
ilo toki li awen ala toki. kalama ala li lon poki. taso ona tu li sona e ni—ona o awen lon poki ni. tenpo suli kama la ona o lon ni. jan ala li ken tawa e ona tan poki lili ni.
meli: telo mute en moku mute li lon.
mije: lon a. sike suno luka la mi awen lon ni la, mi tu li ken awen lon, li ken pona.
meli: (ona li pana e kon lili tan uta) ale li pona. mi tu li wile awen pali. mi ken seme ante a?
tenpo suno nanpa luka luka luka
tenpo suno sin li open. meli li lon tomo ona, li pini e lape lon supa lape. ona li toki insa e pali pi tenpo suno ni: kasi, en nanpa, en ijo jaki, en pali sona ante kin li lon lawa ona. ona li pali e ijo sama lon tenpo suno ale; seme la tenpo suno ni li ken ante?
ona li telo e ona, li len e ona. ona li tawa lupa pi tomo ona … taso ona li awen. ona li kute e kalama nasa. kalama li lili, li wile e wawa ale pi kute ona. kalama ni li lon poka pi kalama ala.
taso lon la, kalama lili a li lon: “mu-u, mu-u, mu-u…”
nasa a. kalama ni li … seme a?
ona li alasa e kalama lon tomo ona. tasa ona li tawa, li kalama kepeken noka la, ona li ken ala kute e kalama lili. ona li awen, li awen e kon lon sijelo ona la, ona li ken kute sin e kalama lili ni: “mu-u, mu-u, mu-u…”
kalama ni li sama … seme? ken la meli li sona e ona. a! ona li sama kalama pi pilin sijelo!
“a a a (ona li mu musi) ni li kalama pi pilin sijelo mi a!” taso … nasa. ona li kute ala e ona lon tenpo ante pini.
pali o open. ona o weka.
meli en mije li lon “tomo suli.” (lon la, ona li lili, li suli ala). ona tu li pali li toki ala. sin la—
mije: meli o, sina ken kute e ni anu seme?
meli: nnn, seme a?
mije: kalama li lon. kalama nasa.
meli: mi ken ala kute e ona. taso…
mije: taso seme?
meli: ala … ken … tomo mi la, mi kin li kute e kalama nasa.
mije: a! ona li sama seme?
meli: ona li sama … kalama pi pilin sijelo. pilin mi la, ona li kalama taso pi pilin sijelo mi.
mije: (tenpo suli la ona li toki ala) ni a—ni li kalama sama: “mu-u, mu-u, mu-u.”
meli: mi … mi ken alasa toki sin tawa kulupu ma.
mije: tenpo suno ale la, mi alasa ni; taso ona li lon ala. a … o alasa sin.
meli: (ona li open e ilo toki) kulupu ma o, sina lon ala lon?
tenpo suli la, kalama ala li kama. pini la …
jan ma: jan mun o! sina lon! mi ale li kute e sina!
meli: mi tu li ken ni kin! kulupu ma o, ijo nasa li lon. o kute …
mije en meli li toki ala, li kon ala. kalama pi ona tu li lon ala. ona tu li kute e ni: “mu-u, mu-u, mu-u…” kute la, kalama li kama wawa.
mije: jan ma o, sina kute ala kute e kalama nasa?
jan ma: kute … a … ni li nasa ala. tenpo la, ilo toki pi poki sina li ken ni. ni li pakala lili ilo taso. o pilin ike ala. o weka e ni tan sona sina! mi ale [toki li pini]
taso … jan mun la, ni li sama ala lon. ni li ken ala pakala pi ilo toki. ilo toki li pini. meli en mije li kalama ala li awen kute e kalama pi pilin sijelo.
ona li kama suli. pilin pi ona tu la, kon ona li sama ni: sina taso ala li lon.
monsuta.
tenpo suno nanpa luka luka luka tu
meli li alasa toki tawa ma kepeken ilo toki. sike lili tawa li ken ante e ilo lon nasin ni: ona li ken toki tawa jan ante, tawa ma ante pi ma sike. taso ona li tawa sike e sike lili la … ala li lon. ona li kute e mu jaki taso tan ilo.
meli: ni li ken ala. kute la, jan ala li lon ma sike.
mije: mi alasa lukin e ma sike kepeken ilo oko wawa…. n, nasa. a!
meli: a seme?
mije: ale pi ma sike la, mi ken lukin e suno wawa lili. ona li … ona li sama … suno pi ilo moli wawa.
meli: mi wile lukin. … a … lon. ma ale pi ma sike la, suno lili mute li lon.
kalama ala. ona li sona e lon. utala suli pi ilo moli wawa li lon ma sike ale. jan ala li ken awen lon.
tenpo suno nanpa mute tu
ona li taso. lon pimeja suli la, ona li taso.
taso … ona li taso ala. kalama pi pilin sijelo li awen. jan tu li ken ala kute ala e ona.
tawa tenpo la, kalama li kama monsuta lili e ona. kalama li tan ijo pilin la, ona li pali ike ala tawa ona tu.
mije: kalama la … mi kama pilin e ni: ona li awen a e mi tu. ni li nasa anu seme?
meli: mi pilin sama. tenpo poka la, ni li kama lon lawa mi: mi kute e kalama ni lon tenpo pini, lon sitelen tawa sona. jan lili li lon insa pi mama ona la, ona li kute e kalama pi pilin sijelo mama. ni li kalama sama. ona li monsuta ala tawa mi … ona li suwi. ona li kama e sona pi mama mi lon lawa mi. (telo lili li kama tan oko).
tenpo suno nanpa mute tu wan
tenpo pimeja ni la, tenpo sama a la, ona tu li lukin e sitelen lape sama. tan mu-u pi pilin sijelo la, ona li ken kute e toki uta. ona li sama toki pi mama meli; kute la, ona li kama tan weka. ona li toki e ni:
kalama uta: “jan mun tu o. mi jan pi ma weka. jan pi ma sina la, mi ante ale. ken la, sona sina la, mi sama jan sewi. tenpo weka pini la, jan mi li pana e ma sina tawa jan sina. tenpo suli a la, mi en jan mi li lukin wawa e ma sina. mi ale li awen e sina, li wile e pona sina, li olin e sina. taso … tenpo mute a la, jan sina li utala, li pakala e ijo pona pi ma sina. pini la, ma sina li pakala ale; jan sina li … weka ale. sina tu li awen lon; mi awen lon poka sina, li sama mama tawa sina. sina taso ala li lon.
sina ken ijo tu. sina ken awen lon poki ni. sina ken awen jan mun. mi pana e moku e telo tawa sina. tenpo suli kama la, sina kama majuna li kama moli. sina moli la, jan pi nasin sina li lon ala. ni li pini jan.
taso ante la, mi ken kama e sina lon ma sin. sina ken kama jan pi ma sin. ma ni la, sina tu li ken mama e jan sin. tenpo suli kama la, ma sin ni la, jan mute a li lon: jan pona, en jan ike, en jan utala, en jan pi utala ala li lon. pona li lon. ike li lon. jan sin li olin e jan ante, li moli kin e ona. ken suli la, jan sin li kama pakala e ma sin ni kin. taso … ona li pali e pona suli kin. jan Atan o! jan Ewa o! wile sina li seme a?”
kalama uta li pini. ona tu li kama tan lape—li sona e wile ona.