mi lon tomo pi jan poka mi. mi tu li wile moku. jan poka mi li jan Ako. ona li pilin ike lon tenpo mute. taso tenpo ni la, ona li pilin pona. ni li pona tawa mi kin.
mi toki tawa jan Ako: “tenpo poka la… pali sina li seme?” ona li toki: “pona mute a.” uta mi li tawa sewi. “pilin sina li seme?” “pona mute a.” “ale sina li seme?” “pona mute a.”
toki ale ni la, kalama ona li sama. ni li… nasa lili. taso pona ona li pona tawa mi.
moku li sijelo soweli li kasi. pilin uta la, sijelo li nasa. ona li sama ko. taso, mi pilin sama ni kin: ijo lili nasa li lon moku.
mi toki e ni: “nn… moku ni li seme?” “pona mute a.” mi mu musi lili. “ala, moku ni li soweli seme?” jan Ako li lukin e mi. “ni li suli ala.”
ni li nasa tawa mi. taso, mi wile pona tawa jan poka mi. ni la, mi moku e sijelo nasa. jan Ako li pilin pona. mi kin o pilin pona. mi awen moku.
moku li pini la, mi tawa sewi tan supa. noka mi li pilin wawa ala. “a, mi o weka.” mi toki e ni. “omekapo!” jan Ako li awen lukin e mi. ona li toki e ni: “tawa… pona.” sinpin ona li ante ala.
mi lon tomo mi la, mi kama pilin nasa. insa mi li tawa sike. poki moku mi li pilin ike. noka mi li kama wawa ala la, mi tawa anpa. moku insa li tawa sewi, sewi, sewi… li tawa weka tan uta mi. telo li lon lukin mi. kon mi li kama nasa.
mi lukin e moku lon anpa. sike lili mute li lon ona. lukin la, ona li sama… sike mama? taso, ijo ante li lon insa mi. mi ken pilin e ona.
ijo nasa li tawa lon insa mi. mi pilin e noka mute. ona li tawa sewi lon lupa moku mi. mi ken ala moku e kon. ona li lon uta mi la, uta mi li open. ijo li pipi suli.
mi alasa moku e kon, taso ken ala. lukin mi li kama pimeja. pipi li tawa insa mi. mi ken pilin e ona lon lawa mi. mi alasa toki. taso toki ala li kama.
mi wile tawa e luka mi. mi alasa tawa. taso ona li awen. mi pilin nasa ike mute. mi pilin…
mi pilin pona.
uta mi li tawa sewi. mi lukin e sike lon anpa. mi kama jo e ona li tawa tomo moku. jan poka mi o kama tawa tomo mi. mi o pali e moku. moku pona.
pona mute a.