jan lawa o! alasa sona sina li ken ala pona. sina wile la o poki e mi lon tenpo ale. sina wile e jan ike lon nasin lawa ike sina la o moli anu poki e mi. taso mi ken ala toki e sona sin. tenpo pini la mi toki e ale pi sona mi. mi toki e ona kepeken nasin pona. mi toki ala e lon ala li ante ala e lon. toki mi li nasa tawa sina la ni li tan pimeja monsuta lon lawa mi. pali monsuta li pana e ona. ona li pakala e lawa mi.
mi sona ala e ni: jan Ali Walen li kama seme. taso mi wile e ni: ona li lape lon moli. tenpo sike luka la mi jan pona ona li jan pali ona lon alasa pi sona nasa ona. ni li lon: tenpo pimeja la jan lukin sina li ken lukin e mi tu lon nena Kenwi. mi tu li tawa ma telo Sipe li jo e ilo suno e palisa pali ma e ilo e linja ilo mute. pali mi la mi kepeken e ona. pali ni li suli lon lawa nasa mi. taso mi toki e pali kama e tan ona lon tenpo mute pini. mi toki e ale pi sona mi. sina toki e ni: toki mi li ken ala lon tan ni: tomo ala li lon ma telo Sipe. mi toki e ni: mi sona e lukin mi taso. ona li ken sitelen lape li ken sitelen pi lawa mi. mi wile e ni. taso, ni taso li lon sona mi tan tenpo pimeja ni. mi ken ala sona e ni: jan Ali Walen li kama ala tan seme.
mi sona e alasa sona nasa pi jan Ali Walen. mi pali lili e ona. lipu nasa ona pi sona ken ala li lon toki mi la mi lukin e ona.. taso lipu mute li lon toki Alapi anu toki ante. lipu suli ona li lon sitelen nasa. mi lukin ala e sitelen ni lon ante. jan Ali Walen li jo e lipu suli ni lon tenpo pimeja ni. tenpo ala la jan Walen li toki e sona pi lipu ni. mi weka sona mute pi alasa sona mi. taso ni li pona tawa mi. alasa sona li ike. mi pali e ona tan wile sona nasa. mi pali ala e ona tan wile pona. tenpo mute la jan Walen li lawa e mi. tenpo lili la mi pilin monsuta tan ona. tenpo pimeja wan la ona li toki e tan ken pi nasa ni: tenpo pi mute lili la sijelo moli li ken ala kama jaki, li awen sin lon insa poki moli ona lon tenpo ale. taso tenpo ni la mi pilin monsuta ala. ona li sona e monsuta wawa pi ken sona ala. ni la mi pilin monsuta tawa ona.
mi sona ala e wile mi lon tenpo pimeja ni. ken suli la wile mi li tan lipu pi sitelen nasa. jan Walen li kama jo e ona tan ma Palata lon tenpo mun pini. taso mi sona ala e ni: mi alasa e seme lon tenpo pimeja ni. jan lukin sina li lukin e mi lon nasin tawa ma telo Sipe lon open pi tenpo pimeja ni. ni li ken lon. taso mi sona ala e ona. mi sona e tenpo wan taso, lon pini pi tenpo pimeja. sike pi mun majuna li sewi lon pimeja.
mi kama tawa ma kiwen pi jan moli. mi pilin monsuta tan majuna lukin ona. ona li lon ma telo lon kasi mute li jo e kon jaki. ona li sama kon pi kiwen jaki. mi pilin monsuta tan ni: mi tu li jan nanpa wan lon tomo ni tan tenpo majuna. mi ken lukin e poki moli e kiwen e tomo moli e kon jaki tan ma anpa lon suno lili mun. ale li pakala lili li jo e selo telo lili li len tan kasi mute.
sona nanpa wan mi li ni: mi pini tawa lon kiwen suli li open e poki mi. ni la mi lukin e ni: poki mi li jo e ilo suno e palisa pali ma tu. poki pi jan Walen li jo e ilo suno sama e ilo toki. mi toki ala tan ni: mi sona e pali mi. mi awen ala. mi open e pali. mi pakala e ma. mi pini la mi lukin e kiwen suli. jan Walen li weka. tenpo lili li kama weka la ona li kama sin li alasa tawa e kiwen kepeken palisa ona. taso ona li ken ala, li toki luka e ni tawa mi: “o pali”. pini la wawa pi mi tu li tawa e kiwen.
lupa pimeja li lon anpa kiwen. kon jaki mute li kama tan ona. ni la mi tu li tawa weka li monsuta. mi kama sin la kon li jaki lili taso. mi lukin e nasin leko. sinpin li jo e telo jaki ma. tenpo ni la mi sona e kalama toki nanpa wan. jan Walen li toki tawa mi. kalama ona li monsuta ala tan ni ale.
ona li toki e ni: “mi wile ala e ni. taso sina o awen lon ma sewi. sina ken ala tawa anpa. toki mi en lipu mi li ken ala pona e sina tawa pali kama mi. mi o pali o lukin e ijo nasa, jan Kate o. ni li pali ike mute. jan li tawa anpa li jo ala e lawa wawa, la lawa ona li pakala li kama nasa. mi wile ala pilin ike e sina. taso sina ken ala tawa anpa. ni li pali mi taso. mi ken ala tawa e sina tawa moli, tawa lawa nasa. mi toki e ni: sina sona ala e lon. taso mi toki tawa sina lon pali ale kepeken ilo toki. mi jo e linja mute pi ilo toki. linja pi ilo toki li suli. mi tawa insa ma la ona li lon kin!”
tenpo ni kin la mi ken kute e nimi ona lon lawa mi. mi ken sona e pilin mi. mi wile tawa, taso ona li ken ala e ni. pini la ona li toki e ni: “sina awen wile tawa la mi weka. alasa ni li kama pini.” ni la mi awen lon sewi tan ni: ona taso li jo e ilo. mi sona e ale ni. taso mi sona ala e wile pi alasa mi. mi awen la jan Walen li open e ilo li kama jo e pini pi linja toki. mi jo e open linja li awen lon kiwen lon poka lupa. ona li tawa anpa.
tenpo lili la mi ken lukin e suno pi ilo suno ona li kute e kalama linja. taso ilo suno li weka tan ni: nasin li tawa poka. kalama kin li weka. mi wan lon suno mun. taso mi lon poka ona kin, kepeken linja toki.
lawa mi li pali e sitelen nasa lon tenpo pimeja pi kalama ala. nasa ni la kiwen li kama pilin, li sona e ijo monsuta. poka pi kiwen moli la kon pimeja li tawa lon nasin, sama kulupu nasa pi tenpo sewi ike. pimeja nasa ni li ken ala tan suno mun pi wawa ala. tenpo ale la mi lukin e ilo tenpo luka mi kepeken ilo suno. mi alasa kute e ilo toki. taso kipisi tu pi tenpo sike lili la ala li lon. sin la ilo toki li pana e kalama lili. mi toki tawa jan Walen. mi monsuta. kalama ona li wawa ala tan pilin monsuta mute. tenpo pini la ona li monsuta ala. taso ni la ona li toki e ni:
“sewi a! sina ken lukin e ni la…”
mi ken ala toki. kalama ala. mi ken awen taso. ona li awen toki e ni:
“jan Kate o! ni li nasa li monsuta li ike. sina ken ala sona e ona!”
ni la kalama mi li pakala ala. mi awen monsuta. taso mi toki mute e alasa sona mute: “jan Walen o! seme li lon? seme li lon?”
mi kute e toki pi jan pona mi. kalama ona li monsuta li toki e ni:
“jan Kate o! mi ken ala toki e ona. lawa ala li ken sona e ni. mi o toki ala. jan li sona la ona li moli. sewi a! sitelen lape mi li ken ala pali e ni!” ala li lon. kalama mi li lon taso. mi awen alasa sona tan ona. jan Walen li monsuta mute li toki e ni:
“jan Kate o! sina ken la o pana e kiwen suli tawa lupa o tawa weka! o pali! o jo ala e ijo o tawa weka taso! ni li tenpo ken taso. o pali o alasa sona ala!”
mi kute. taso mi ken awen alasa sona taso. kiwen moli en pimeja li lon poka mi. ijo nasa monsuta li lon anpa mi. taso jan pona mi li lon tenpo pi ken moli. ni la mi pilin monsuta li pilin e ni: mi ken ala tawa weka. mi pali la ona li wan taso lon anpa. kalama lili li lon. tenpo lili li kama weka la jan Walen li pali e kalama suli li toki e ni:
“o weka! jan Kate o pana e kiwen o weka!”
ni la mi pilin e ni: mi o pali e ijo. mi toki e ni: “jan Walen o awen! mi tawa anpa!” ni la ona li monsuta mute. kalama ona li kama monsuta:
“o ala! sina sona ala! mi ken ala pali tan mi. o pana e kiwen o tawa. sina ken pali e ni taso lon tenpo ni!” kalama ona li ante. ona li kama anpa. taso ona li awen monsuta kin.
ona li toki e ni: “o pali!” mi kute ala e ona li alasa pali. mi wile tawa anpa. taso kalama ona sin li monsuta e mi. ona li toki e ni:
“ona li tawa ala… sina o… jan wan li ike la tu li ike mute… kiwen” ona li toki ala lon tenpo lili. ona li awen la kalama lili en toki ona li lon. ona li toki e ni:
“pini li kama. o suli ala e ike. o pini e nasin leko o weka. tenpo sina li kama lili. o tawa pona. mi tu li toki ala lon tenpo kama” ni la kalama lili pi jan Walen li kama anpa. ona li pilin ike mute li awen toki e ni:
“ijo ike ni o moli! sewi a! o weka! o weka!”
ona li pini la kalama ala li lon. mi awen toki tawa ona. taso mi kute ala e ona. mi sona ala e ni: mi awen lon tenpo seme. taso mi awen toki e ni: “jan Walen o! jan Walen o! o toki! sina lon ala lon?”
pini la ijo monsuta ike nasa li kama tawa mi! mi pini toki la mi kute e kalama lili tan ilo toki. mi alasa kute mute. sin la mi toki e ni: “jan Walen o. sina lon ala lon?”. taso ijo ante li toki tawa mi. ijo ni li pakala e lawa mi. mi ken ala toki e ona. mi ken ala sona e ona. ona li weka e sona mi tan tenpo ike, tawa tenpo mi pi kama lape ala, lon tomo misikeke. mi ken toki e ni taso: kalama ike li suli li jo ala e kon li weka li tan jan ala. taso mi o toki e seme sin? ni li pini pi sona mi. mi kute taso e ona. mi sona ala e ona. mi kute e kalama tan tomo moli tan anpa tan ma pi kon pimeja. ona li toki e ni:
“jan Walen li moli!”
jan Tene li toki pona e toki ante pi jan Epi Laka lon ni